وزیراعظم محمد شہباز شریف کی متعدی امراض پر قابو پانے کیلئے ماہرین کی خصوصی کمیٹی تشکیل دینے کی ہدایت

جمعہ 3 جولائی 2026 17:43

اسلام آباد (اُردو پوائنٹ اخبارتازہ ترین - این این آئی۔ 03 جولائی2026ء) وزیراعظم محمد شہباز شریف نے متعدی امراض پر قابو پانے کیلئے ماہرین کی خصوصی کمیٹی تشکیل دینے کی ہدایت کرتے ہوئے کہاہے کہ متعدی امراض کے پھیلاؤ کے فوری سد باب کے لیے ملک بھر میں غیر معیاری سرنجز کی تیاری اور استعمال پر مکمل پابندی لگائی جائے،خلاف ضابطہ سرنجز کے استعمال میں ملوث یا اسکی روک تھام میں مجرمانہ غفلت کے مرتکب افراد اور ہسپتالوں کے خلاف قانونی کارروائی کی جائے۔

وزیراعظم محمد شہباز شریف کی زیر صدارت ایڈز اور ہیپاٹائٹس سی جیسے متعدی امراض کی روک تھام کے لیے اٹھائے گئے اقدامات پر جائزہ اجلاس ہوا جس میں اظہار خیال کرتے ہوئے متعدی امراض کے پھیلاؤ کے فوری سد باب کے لیے ملک بھر میں غیر معیاری سرنجز کی تیاری اور استعمال پر مکمل پابندی لگائی جائے۔

(جاری ہے)

وزیر اعظم نے کہاکہ خلاف ضابطہ سرنجز کے استعمال میں ملوث یا اسکی روک تھام میں مجرمانہ غفلت کے مرتکب افراد اور ہسپتالوں کے خلاف قانونی کارروائی کی جائے۔

وزیر اعظم نے کہاکہ کمیٹی اپنی سفارشات مرتب کرتے وقت صوبوں سے مشاورت یقینی بنائے۔ وزیر اعظم نے کہاکہ وزرات قانون متعلقہ اداروں کے ساتھ مل کر قانونی اور ریگولیٹری فریم ورک میں ضروری ترامیم تجویز کرے۔ وزیر اعظم نے کہاکہ قومی سطح پر جامع حکمت عملی کی تشکیل اور موثر نفاذ ہی اس مسئلے کا حل ہے۔ وزیر اعظم نے کہاکہ سرنجز سے متعدی امراض کے پھیلنے کے مستقل سدباب کیلئے ڈریپ میڈیکل آلات کی انڈسٹری سے مشاورت کرکے پالیسی اقدامات تجویز کرے۔

وزیر اعظم نے کہاکہ متعدی امراض کے پھیلاؤ کے سد باب کی جاری کوششوں میں بین الاقوامی شراکت داروں کی معاونت انتہائی اہم ہے۔ وزیر اعظم نے کہاکہ علاج سے متعلقہ آلات کی مینوفیکچرنگ اور شعبہ صحت کے عملہ کی عالمی معیار کی ٹریننگ پر بھی خصوصی توجہ دینے کی ضرورت ہے۔ اجلاس میں وزیراعظم کی ہدایت پر قائم کردہ خصوصی ٹاسک فورس اور وزرات قومی صحت کی جانب سے متعدی امراض کے پھیلاؤ کے سد باب کیلئے اٹھائو گئے اقدامات پر بریفنگ دی گئی۔اجلاس میں وفاقی وزیر قانون اعظم نذیر تارڑ، وزیر مملکت برائے صحت ڈاکٹر مختار احمد بھرت، اٹارنی جنرل آف پاکستان منصور اعوان ، گلوبل فنڈ کی نمائندہ ، پبلک ہیلتھ کے ماہرین، وزرات قومی صحت، ڈریپ کے نمائندگان اور اعلی سرکاری حکام نے شرکت کی۔