مبینہ منشیات ڈیلرانمول عرف پنکی کے سابق شوہر ریٹائرڈ پولیس افسر رانا اکرم کیخلاف مقدمہ درج کرلیا گیا

جولائی2024 میں ملزم رانا اکرم 10 سے زائد پولیس اہلکاروں کے ساتھ زبردستی گھر میں گھسا اور شوہر پر تشدد کیا، ملزمان گھر سے 55 لاکھ مالیت کے زیورات اور گاڑی بھی لے گئے۔ مدعیہ مقدمہ خاتون یاسمین تبسم

ثنااللہ ناگرہ جمعہ 3 جولائی 2026 19:31

لاہور (اردوپوائنٹ اخبار تازہ ترین۔ انٹرنیشنل پریس ایجنسی۔ 03 جولائی 2026ء ) مبینہ منشیات ڈیلرانمول عرف پنکی کے سابق شوہر ریٹائرڈ پولیس افسر رانا اکرم کیخلاف مقدمہ درج کرلیا گیا، مقدمہ یاسمین تبسم نامی خاتون کی مدعیت میں درج کیا گیا ہے۔ اے آروائی نیوز کے مطابق انمول عرف پنکی کے سابق شوہر ریٹائرڈ پولیس افسر رانا اکرم کیخلاف مقدمہ یاسمین تبسم نامی خاتون کی مدعیت میں سی سی پی او کی انکوائری میں قصوروار ثابت ہونے پر درج کیا گیا ہے۔

مقدمے میں مدعیہ نے الزام عائد کیا کہ جولائی 2024 میں ملزم رانا اکرم 10 سے زائد پولیس اہلکاروں کے ساتھ زبردستی گھر میں گھسا اور پولیس اہلکار کے ساتھ مل کر شوہر پر تشدد کیا۔ ملزمان گھر سے 55 لاکھ مالیت کے زیورات، ملکی و غیر ملکی کرنسی و دیگر قیمتی سامان ساتھ لے گئے، انہوں نے میرے شوہر پر جھوٹا مقدمہ درج کروایا اور انہیں بھی ساتھ لے گئے، ملزمان گھر سے ایک گاڑی بھی لے کر فرار ہوگئے۔

(جاری ہے)

اس سے قبل 23 جون کی رپورٹ کے مطابق منشیات ڈیلر انمول عرف پنکی کی سہولت کاری کے بوٹ بیسن کے مقدمے میں پولیس نے میں ملزمہ کی گرفتاری ظاہر کر دی۔جوڈیشل مجسٹریٹ جنوبی کی عدالت میں کیس کی سماعت ہوئی جہاں پولیس نے دو ملزمان عاقب اور غلام مصطفی کو عدالت میں پیش کیا۔عدالت نے گارڈن اور بوٹ بیسن تھانوں کے مقدمات میں ملزمان کو عدالتی ریمانڈ پر جیل بھیج دیا۔

واضح رہے کہ 20 جون کو جوڈیشل مجسٹریٹ جنوبی کی عدالت نے ڈرگ ڈیلر انمول عرف پنکی کے خلاف 2 مقدمات کا حتمی چالان عاشورہ محرم کے بعد جمع کروانے کا حکم دیا تھا۔عدالت کے روبرو ڈرگ ڈیلر انمول عرف پنکی کے خلاف دو مقدمات کی سماعت ہوئی تھی جب کہ گارڈن پولیس مقدمات کا حتمی چالان پیش نہیں کر سکی تھی۔عدالت نے ملزمہ انمول عرف پنکی اور دیگر کے خلاف منشیات کے مقدمے سے شریک ملزمان کا نام خارج کرنے اور کال ریکارڈ کی درخواستوں پر فیصلہ بھی محفوظ کیا تھا۔