ٹیکس کا نفاذ ملاکنڈ ڈویژن کے عوام پر ظلم ہے، ہر سطح پر بھرپور مزاحمت کریں گے، فضل حکیم

اتوار 5 جولائی 2026 20:35

سوات(اُردو پوائنٹ اخبارتازہ ترین - این این آئی۔ 05 جولائی2026ء) پاکستان تحریک انصاف ملاکنڈ ریجن کے صدر اور رکن صوبائی اسمبلی فضل حکیم خان نے کہا ہے کہ ملاکنڈ ڈویژن پر ٹیکس کا نفاذ عوام کے معاشی حقوق پر براہ راست حملہ اور ظلم ہے، جسے کسی بھی صورت قبول نہیں کیا جائے گا، ملاکنڈ ڈویژن کے عوام گزشتہ کئی دہائیوں سے دہشت گردی، بدامنی، سیلاب، زلزلوں اور دیگر قدرتی آفات کے باعث بے شمار جانی و مالی نقصانات برداشت کر چکے ہیں، ایسے حالات میں مزید ٹیکسوں کا بوجھ ڈالنا سراسر ناانصافی ہے۔

انہوں نے کہا کہ نشاط چوک مینگورہ میں منعقدہ "ٹیکس نامنظور" عوامی جلسے میں ایم این اے سلیم الرحمان، تاجروں، وکلا، سیاسی و سماجی شخصیات، مختلف شعبہ ہائے زندگی سے تعلق رکھنے والے افراد اور ہزاروں شہریوں کی بھرپور شرکت اس بات کا واضح ثبوت ہے کہ ملاکنڈ ڈویژن کے عوام ٹیکس کے نفاذ کو یکسر مسترد کرتے ہیں۔

(جاری ہے)

ان کا کہنا تھا کہ عوام نے اتحاد اور یکجہتی کا مظاہرہ کرتے ہوئے واضح پیغام دیا ہے کہ وہ اپنے آئینی و قانونی حقوق پر کسی قسم کا سمجھوتہ نہیں کریں گے۔

فضل حکیم نے کہا کہ پاکستان تحریک انصاف نے ہمیشہ عوامی حقوق، آئینی انصاف اور عوامی مفادات کی سیاست کی ہے اور آئندہ بھی ملاکنڈ ڈویژن کے عوام کے مفادات کے دفاع کے لیے ہر آئینی، قانونی اور جمہوری فورم پر بھرپور آواز بلند کرتی رہے گی۔ انہوں نے حکومت پر زور دیا کہ عوام پر ناجائز ٹیکس عائد کرنے کے بجائے خطے میں روزگار، تجارت، سرمایہ کاری اور ترقی کے مواقع پیدا کیے جائیں اور ملاکنڈ ڈویژن کی آئینی حیثیت، تاریخی پس منظر اور عوام سے کیے گئے وعدوں کا احترام کیا جائے۔

انہوں نے جلسے میں شریک تمام کارکنان، تاجروں، وکلا، سیاسی جماعتوں، سماجی شخصیات، نوجوانوں اور بزرگوں کا شکریہ ادا کرتے ہوئے کہا کہ عوام کا اتحاد ہی ان کے حقوق کے تحفظ کی سب سے بڑی ضمانت ہے اور ملاکنڈ ڈویژن کے عوام کے جائز حقوق پر کسی قسم کا سمجھوتہ نہیں کیا جائے گا، جبکہ ٹیکس کے نفاذ کے خلاف پرامن، آئینی اور جمہوری جدوجہد ہر سطح پر جاری رکھی جائے گی۔