ڈیجیٹل پاکستان وژن؛ صرف دو ہفتوں میں 2 لاکھ 32 ہزار سے زائد عازمین حج نے آن لائن رجسٹریشن کروالی

گھر بیٹھے پاک حج ایپ اور پورٹل کے ذریعے چند منٹوں میں سارا عمل آسان بنا دیا گیا، حج 2027ء تا 2030ء کا ڈیٹا جاری

ساجد علی پیر 6 جولائی 2026 10:56

ڈیجیٹل پاکستان وژن؛ صرف دو ہفتوں میں 2 لاکھ 32 ہزار سے زائد عازمین حج ..

اسلام آباد (اُردو پوائنٹ اخبارتازہ ترین۔ 06 جولائی 2026ء) حکومتِ پاکستان کے 'ڈیجیٹل پاکستان' وژن کے تحت حج رجسٹریشن کے عمل میں صرف دو ہفتوں کے مختصر عرصے کے دوران ملک بھر سے سوا دو لاکھ سے زائد عازمینِ حج نے گھر بیٹھے کامیابی کے ساتھ اپنی آن لائن رجسٹریشن کا عمل مکمل کر لیا۔ وزارتِ مذہبی امور کے مطابق حج 2027ء سے 2030ء تک کے لیے آن لائن رجسٹریشن کا عمل تاحال کامیابی سے جاری ہے، نیشنل آئی ٹی بورڈ کی تیار کردہ جدید 'پاک حج ایپ' اور آن لائن ویب پورٹل نے حج رجسٹریشن کے روایتی اور مشکل عمل کو انتہائی آسان اور تیز بنا دیا ہے، جس کی بدولت پہلے 14 روز کے دوران 2 لاکھ 32 ہزار سے زائد عازمین نے چند منٹوں میں خود کو رجسٹرڈ کیا۔

جاری کردہ آفیشل ڈیٹا میں بتایا گیا ہے کہ اب تک رجسٹرڈ ہونے والے عازمین میں سے اکثریت نے سرکاری اسکیم پر اعتماد کا اظہار کیا ہے، ایک لاکھ 75 ہزار سے زائد عازمین نے سرکاری حج اسکیم کا انتخاب کیا، جبکہ 58 ہزار سے زائد افراد نے پرائیویٹ حج اسکیم کے تحت خود کو رجسٹرڈ کروایا، اب تک رجسٹرڈ ہونے والے مجموعی عازمینِ حج میں 1 لاکھ 36 ہزار مرد عازمین جبکہ 96 ہزار خواتین عازمین شامل ہیں۔

(جاری ہے)

مزید یہ بھی معلوم ہوا ہے کہ آن لائن رجسٹریشن کرانے والوں میں صوبوں کے لحاظ سے سب سے بڑی تعداد پنجاب سے ہے جہاں سے 1 لاکھ 8 ہزار عازمین نے رجسٹریشن کرائی، سندھ دوسرے نمبر پر رہا جہاں سے 71 ہزار اور خیبر پختونخواہ سے 33 ہزار عازمین نے اب تک اپلائی کیا ہے۔ وزارتِ مذہبی امور نے واضح کیا ہے کہ نئی ہدایات جاری ہونے تک حج 2027ء تا 2030ء کے لیے آن لائن رجسٹریشن کا یہ ڈیجیٹل عمل بلا تعطل چوبیس گھنٹے جاری رہے گا، وزارت نے حج کے خواہش مند تمام شہریوں کو مشورہ دیا ہے کہ وہ آخری تاریخوں میں کسی بھی ممکنہ سسٹم اوور لوڈ یا رش سے بچنے کے لیے جلد سے جلد پاک حج ایپ یا پورٹل کے ذریعے اپنی آن لائن رجسٹریشن مکمل کر لیں۔