غ*شہبازگل پر انڈے پھینکنے کا مقدمہ،پانچ سال بعد ن لیگ کے ملزمان پر فردجرم عائد

بدھ 8 جولائی 2026 17:45

oلاہور (اُردو پوائنٹ اخبارتازہ ترین - آن لائن۔ 08 جولائی2026ء) لاہور ہائیکورٹ میں پاکستان تحریک انصاف کے رہنما شہباز گل پر پیشی کے دوران سیاہی اور انڈے پھینکنے کے مقدمے میں جوڈیشل مجسٹریٹ سعد الرحمان نے پانچ سال بعدنامزد مسلم لیگ (ن) کے کارکنان غلام عباس اور طارق جٹ پر فرد جرم عائد کر دی۔لاہور میں جوڈیشل مجسٹریٹ سعد الرحمان نے شہباز گل پر انڈے اور سیاہی پھینکنے کے مقدمے کی سماعت کی، عدالتی حکم پر تمام ملزمان نے پیش ہوکر اپنی اپنی حاضری مکمل کروائی، اس دوران ملزمان کو چارج شیٹ پڑھ کر سنائی گئی، جس پر ملزمان نے صحت جرم سے انکار کیا جس کے بعد عدالت نے لیگی کارکنوں غلام عباس اور طارق جٹ پر فرد جرم عائد کردی۔

عدالت نے ملزمان کے انکار کے بعد استغاثہ کے گواہان کو آئندہ سماعت پر طلب کرتے ہوئے کیس کی مزید کارروائی ملتوی کر دی۔

(جاری ہے)

یاد رہے کہ یہ مقدمہ اس وقت درج کیا گیا تھا جب پاکستان تحریک انصاف کے رہنما شہباز گل لاہور ہائیکورٹ میں ایک مقدمے کی سماعت کے سلسلے میں پیش ہوئے تھے، اس دوران عدالت کے احاطے میں موجود بعض افراد نے ان پر سیاہی اور انڈے پھینکے تھے، جس کے بعد موقع پر بدنظمی پیدا ہوگئی تھی۔واقعے کی ویڈیوز بھی سوشل میڈیا پر وائرل ہوئی تھیں، جبکہ پولیس نے سرکاری مدعیت میں مقدمہ درج کرکے متعدد افراد کو نامزد کیا تھا۔