ایران،بوشہر کی 2 فوجی تنصیبات پر حملہ، حکام کی تصدیق

تہران /واشنگٹن/انقرہ (اُردو پوائنٹ اخبارتازہ ترین - این این آئی۔ 09 جولائی2026ء) ایران کے جنوبی صوبے بوشہر میں فوجی تنصیبات کو نشانہ بنایا گیا ہے اہم انفرااسٹرکچر یا ساز و سامان کو کسی قسم کا نقصان نہیں ہوا جبکہ امریکی صدر ڈونلڈ ٹرمپ نے ایک بارپھر دھمکی دی ہے کہ ایران کو ممکنہ طور پر نشانہ بناسکتے ہیں، تہران سے معاہدے میں بہت مشکلات رہیں۔

ایرانی میڈیا کی رپورٹس کے مطابق صوبائی سیکیورٹی حکام نے تصدیق کی ہے کہ امریکا اور اسرائیل کی جانب سے ہونے والے حملوں میں بوشہر کی 2 فوجی تنصیبات کو نشانہ بنایا گیا۔بوشہر کے نائب گورنر برائے سیاسی و سیکیورٹی امور کے مطابق دشتی کانٹی میں واقع ایک فوجی تنصیب کو علی الصبح حملے کا نشانہ بنایا گیا۔انہوں نے بتایا ہے کہ بعد ازاں چغادک شہر کے قریب واقع ایک اور فوجی تنصیب پر بھی حملہ کیا گیا۔

(جاری ہے)

اس سے قبل جنوبی ایران کے شہروں بندر عباس اور بوشہر میں دھماکوں کی آوازیں سنی گئی تھیں۔دوسری جانب ایران نے بندر عباس ایئر پورٹ کو نقصان پہنچنے کی خبروں کی تردید کر دی۔صوبہ ہرمزگان کی ایئر پورٹ انتظامیہ نے کہا کہ منگل کی شب ہونے والے امریکی حملوں کے باوجود بندر عباس بین الاقوامی ہوائی اڈے کے بنیادی ڈھانچے یا آلات کو کوئی نقصان نہیں پہنچا۔

انتظامیہ کے مطابق ہوائی اڈے کی تنصیبات اور آپریشنل نظام محفوظ ہیں اور حملوں کے نتیجے میں انفرااسٹرکچر یا ساز و سامان کو کسی قسم کا نقصان نہیں ہوا۔دریں اثناء ایرانی وزارت خارجہ نے کہاکہ امریکا کی جانب سے عبوری معاہدے کی کھلی خلاف ورزی کی مذمت کرتے ہیں۔ایرانی وزارتِ خارجہ کے مطابق آبنائے ہرمز میں ایرانی انتظامات کی خلاف ورزی کی جا رہی ہے اور لبنان میں اسرائیلی حملوں کا تسلسل بھی جاری ہے۔

ایرانی وزارتِ خارجہ نے کہاکہ آبنائے ہرمز اور لبنان کی صورتِ حال عبوری معاہدے کو غیر موثر بنا رہی ہیں۔ایرانی وزارتِ خارجہ کے مطابق خطے کے ممالک ایران پر حملے کے لیے امریکا کو اپنی سرزمین استعمال نہ کرنے دیں، حالیہ کشیدگی کے سنگین نتائج کی ذمے داری امریکا پر عائد ہوتی ہے۔ایران نے کہا کہ حملوں اور تیل کی فروخت پر پابندی کے اقدامات کے بعد ایم او یو کے بعض حصے اپنی افادیت کھو چکے، ایران کے خلاف جارحیت اور حملوں کے لیے استعمال مقامات کو نشانہ بنائیں گے۔

واضح رہے کہ امریکی فوج کے ایران کے خلاف نئے حملوں کے بعد ایران کی پاسدارانِ انقلاب نے ملک کے جنوب میں امریکی ڈرون مار گرانے کا دعویٰ کیا ہے۔پاسدارانِ انقلاب کی جانب سے کہا گیا ہے کہ بحرین اور کویت میں 85 امریکی اہداف کو نشانہ بنایا ہے۔دوسری جانب ایران کے اعلی مذاکرات کار اور اسپیکر باقر قالیباف نے کہا ہے کہ امریکا نے جنگ بندی سے متعلق ایم او یو کی سنگین خلاف ورزی کی ہے، جنوبی ایران پر حملے، تیل مصنوعات پر پابندی اور مزید حملوں کی دھمکیاں ایم او یو کی خلاف ورزی ہیں۔

دریں اثنا ایرانی صدر مسعود پزشکیان نے کہا ہے کہ بطور فٹبال ورلڈ کپ میزبان امریکا کا طرزِ عمل اس کی روایتی خارجہ پالیسی کا عکاس ہے۔مسعود پزشکیان نے اپنے بیان میں کہا کہ قوانین کو اپنے مطابق موڑنا، دبائو ڈالنا، رکاوٹیں لگانا اور دھوکا دینا ہی امریکی خارجہ پالیسی ہے۔انہوں نے کہا کہ ہم ایسے کھیل کو مسترد کرتے ہیں، ایران اپنے حقوق کے دفاع میں مضبوطی سے کھڑا ہے۔

دوسری جانب امریکی صدر ڈونلڈ ٹرمپ نے کہا کہ ایران کو ممکنہ طور پر نشانہ بناسکتے ہیں، تہران سے معاہدے میں بہت مشکلات رہیں۔ترکیہ میں یوکرین کے صدر زیلنسکی سے ملاقات اور میڈیا سے گفتگو میں صدر ٹرمپ نے کہا کہ ترکیہ میں نیٹو کا اجلاس شاندار رہا، کئی جنگیں رکوائیں، یوکرین اور روس کی جنگ بھی رکواوں گا۔انہوں نے کہا کہ ایران سے معاہدے میں بہت مشکلات رہیں، تہران کئی دہائیوں تک دنیا کو دھمکاتا رہا ہے، اسے ممکنہ طور پر نشانہ بنا سکتے ہیں۔

امریکی صدر نے کہا کہ ایران سے خوش نہیں ہوں، ایران نے گزشتہ روز جہازوں پر ڈرون حملے کیے، معاہدہ ایران کے جوہری ہتھیاروں کے آگے ایک دیوار ہے۔انہوںنے کہاکہ ایرانی جھوٹ بولتے ہیں، انہوں نے دھوکا کیا، لوگوں کو مارتے ہیں، یہ 47 سال سے لوگوں کو قتل کررہے ہیں، اوباما نے ایران کو رقم دی، اوباما کی ڈیل بدترین تھی۔ڈونلڈ ٹرمپ نے کہا کہ ہم نے گزشتہ رات ایران پر سخت حملہ کیا ممکن ہے سخت نشانہ بنائیں، ایرانی رہنما مشرق وسطی کے بدمعاش بنے ہوئے تھے اب وہ بدمعاش نہیں رہے۔