میانوالی مدر اینڈ چائلڈ ہسپتال سے عمران خان کے نام کی تختی ہٹائے جانے کا انکشاف

ہسپتال تقریباً 3 ارب روپے کی لاگت سے پی ٹی آئی دور میں مکمل ہوا، عمران خان کے نام کی تختی جو مدر اینڈ چائلڈ ہسپتال اور نرسنگ کالج کے مین گیٹ پر نصب تھی، اکھاڑ کر سٹور روم میں پھینک دی گئی؛ بیرسٹر ابوزر سلمان نیازی کی مذمت

ساجد علی جمعرات 9 جولائی 2026 14:47

میانوالی مدر اینڈ چائلڈ ہسپتال سے عمران خان کے نام کی تختی ہٹائے جانے ..

میانوالی (اُردو پوائنٹ اخبارتازہ ترین۔ 09 جولائی 2026ء) تحریک انصاف کے رہنماء اور قانون دان بیرسٹر ابوذر سلمان نیازی نے میانوالی میں مدر اینڈ چائلڈ ہسپتال سے سابق وزیراعظم عمران خان کے نام کی تختی ہٹائے جانے اور ہسپتال کا آزادانہ وجود ختم کرنے پر موجودہ حکومت کو شدید تنقید کا نشانہ بنایا ہے، انہوں نے اس عمل کو شرمناک قرار دیتے ہوئے کہا ہے کہ عوامی منصوبے کسی سیاسی جماعت کی نہیں بلکہ عوام کی ملکیت ہوتے ہیں۔

اس حوالے سے سوشل میڈیا پلیٹ فارم ایکس پر اپنے ایک بیان میں بیرسٹر ابوذر سلمان نیازی کا کہنا ہے کہ یہ انتہائی شرمناک امر ہے کہ سابق وزیراعظم عمران خان کے نام کی تختی، جو 200 بیڈز پر مشتمل مدر اینڈ چائلڈ ہسپتال اور نرسنگ کالج میانوالی کے مین گیٹ پر نصب تھی، اسے اکھاڑ کر ایک اسٹور روم میں پھینک دیا گیا ہے۔

(جاری ہے)

شرمناک امر یہ ہے کہ وزیراعظم عمران خان صاحب کے نام کی تختی، جو 200 بیڈ مدر اینڈ چائلڈ ہسپتال اور نرسنگ کالج میانوالی کے مین گیٹ پر نصب تھی، اکھاڑ کر سٹور روم میں پھینک دی گئی۔ عمران خان صاحب نے تقریباً 3 ارب روپے کی لاگت سے مکمل ہونے والا یہ مدر اینڈ چائلڈ ہسپتال میانوالی کے عوام… pic.twitter.com/IT4bVS0TDI
— Barrister Abuzar Salman Niazi (@SalmanKNiazi1) July 8, 2026

انہوں نے یاد دہانی کرواتے ہوئے بتایا کہ عمران خان نے تقریباً 3 ارب روپے کی بھاری لاگت سے مکمل ہونے والا یہ جدید مدر اینڈ چائلڈ ہسپتال میانوالی کے عوام کو تحفے میں دیا تھا، یہ ہسپتال ناصرف میانوالی بلکہ پورے سرگودھا ڈویژن کے شہریوں کے لیے ایک عظیم طبی سہولت فراہم کر رہا تھا، اس تاریخی منصوبے کا باقاعدہ افتتاح خود عمران خان نے دسمبر 2022ء میں کیا تھا۔

بیرسٹر ابوذر سلمان نیازی نے موجودہ حکومت پر تنقید کرتے ہوئے کہا کہ اس فارم 47 کی حکومت نے اس آزاد ہسپتال کو ختم کرکے ڈسٹرکٹ ہیڈکوارٹر ہسپتال میں ضم کر دیا ہے اور اب عمران خان کے نام کی تختیاں بھی اتاری جا رہی ہیں، اس اقدام سے یہ واضح ہوتا ہے کہ یہ حکومت عمران خان کے عوامی منصوبوں کی شناخت اور تاریخ کو مٹانے کی باقاعدہ کوشش کر رہی ہے۔ انہوں نے اپنے بیان کے آخر میں واضح کیا کہ حکمرانوں کو یہ بات سمجھنی چاہیئے کہ عوامی مفاد کے منصوبے کسی سیاسی جماعت کی ذاتی جاگیر یا ملکیت نہیں ہوتے، بلکہ یہ عوام کے ٹیکسوں سے بنتے ہیں اور عوام کی ہی ملکیت ہوتے ہیں، اس لیے ان پر ایسی سیاست چمکانا افسوسناک ہے۔