ہاکی کے کھلاڑیوں ، کوچز کی تربیت کے لئے 5 انٹرنیشنل کوچز پاکستان پہنچ رہے ہیں، سیف گیمز کیلئے 6 ارب روپے کے فنڈز درکار، سیکرٹری آئی پی سی محی الدین وانی کی قائمہ کمیٹی کو بریفنگ

اسلام آباد (اُردو پوائنٹ اخبارتازہ ترین - اے پی پی۔ 09 جولائی2026ء) وفاقی سیکرٹری بین الصوبائی رابطہ محی الدین احمد وانی نے کہا ہے کہ قومی کھیل ہاکی کے فروغ کے لئے 5 بین الاقوامی کوچز پاکستان پہنچ رہے ہیں، اسلام آباد اور لاہور میں سیف گیمز کے انعقاد کے لئے 6 ارب روپے کے فنڈز درکارہیں، 12 سالہ معطلی کے بعد فیفا نے پاکستان کی نئی فٹ بال باڈی کو تسلیم کر کے ملک میں انٹرنیشنل میچز بحال کر دیئے ہیں۔

قومی اسمبلی کی قائمہ کمیٹی برائے بین الصوبائی رابطہ کو بریفنگ دیتے ہوئے انہوں نے کھیلوں کے پی ایس ڈی پی فنڈز کو 90 کروڑ سے بڑھا کر 1 ارب 90 کروڑ روپے کرنے، فیڈریشنز کے لئے 50 کروڑ کی الگ گرانٹ اور گراس روٹ لیول پر 750 تعلیمی اداروں کے لئے ’سکول سپورٹس پروگرام‘ شروع کرنے کا بھی اعلان کیا۔

(جاری ہے)

قومی کھیل ہاکی کے حوالے سے انہوں نے بتایا کہ ہاکی کو اس کا کھویا ہوا مقام دلانے کے لئے 4 انٹرنیشنل کوچز کل اور ایک مزید کوچ اگلے دن پاکستان پہنچ کر قومی ٹیم اور مقامی کوچز کو جدید تربیت دیں گے۔

انہوں نے بتایا کہ 10 سال بعد پاکستان نے بڑی ٹیموں کا سامنا کیا ہے، پرو لیگ میں شکست کے 14 میچوں میں سے 10 میچز ان کے پی ایچ ایف کا چارج سنبھالنے سے قبل کے تھے جبکہ کپتان کی عدم موجودگی اور دو کھلاڑیوں کے زخمی ہونے کے باوجود ٹیم کلوز مارجن سے ہاری۔ اب جونیئر ٹیم کا کیمپ ایبٹ آباد میں لگایا جا رہا ہے اور آئی ایچ ایف کی گائیڈ لائنز ملتے ہی پی ایچ ایف کے الیکشن کرا دیئے جائیں گے۔

انہوں نے بتایا کہ سائوتھ ایشین گیمز کے 60 فیصد اخراجات وفاق اور 40 فیصد صوبہ برداشت کرے گا جبکہ فیڈریشنز کی گرانٹ کے لئے 50 کروڑ روپے الگ سے دیئے جا رہے ہیں جو کھلاڑیوں کی تربیت اور غیر ملکی دوروں پر خرچ ہوں گے۔بجٹ کے حوالے سے محی الدین وانی نے بتایا کہ پی ایس ڈی پی فنڈز میں اضافے سے 14 جاری منصوبوں میں سے 8 رواں سال مکمل ہو جائیں گے جبکہ وزارت کے کرنٹ بجٹ کے لئے 5 ارب روپے مختص کیے گئے ہیں۔

فٹ بال کے امور پر بات کرتے ہوئے انہوں نے بتایا کہ پاکستان سپورٹس بورڈ کے الیکشن کے بعد بننے والی نئی باڈی کو فیفا اور پی او اے نے تسلیم کر لیا ہے جس سے ملک میں انٹرنیشنل فٹ بال میچز شروع ہو چکے ہیں اور پاکستان کی بوائز اور گرلز ٹیمیں عالمی مقابلوں میں حصہ لے رہی ہیں، توقع ہے کہ ایک سال میں فٹ بال ٹیم مزید بہتر پرفارم کرے گی جبکہ پاکستان کی گرلز ہاکی ٹیم بھی جلد عمان کے دورے پر روانہ ہوگی۔

سیکرٹری بین الصوبائی رابطہ نے کھلاڑیوں کی ملکی سطح پر تیاری اور علاقائی پروگرامز کا ذکر کرتے ہوئے بتایا کہ پاکستان سپورٹس بورڈ 37 کھیلوں کے کھلاڑیوں کو ملکی اور عالمی مقابلوں سے قبل مفت رہائش اور کھانے کے ساتھ تربیتی کیمپس فراہم کرتا ہے۔ آخر میں انہوں نے گراس روٹ لیول سے ٹیلنٹ سامنے لانے کے لئے ’سکول ایجوکیشن سپورٹس پروگرام‘ کا اعلان کیا جس کے تحت ملک بھر کے 750 تعلیمی اداروں کے بچوں اور بچیوں کو مفت سپورٹس کٹس فراہم کی جا رہی ہیں اور ابتدائی طور پر ڈویژن کی سطح پر 50 تعلیمی اداروں کو یہ کٹس دی جا رہی ہیں تاکہ سکول کی سطح سے ہی کھیلوں کو فروغ دیا جا سکے۔