یونیورسٹی آف سینٹرل پنجاب ملتان کیمپس میں محترمہ فاطمہ جناحؒ کی 59ویں برسی پر مادرِ ملت کانفرنس و ایوارڈز کا انعقاد

جمعرات 9 جولائی 2026 20:32

ملتان (اُردو پوائنٹ اخبارتازہ ترین - اے پی پی۔ 09 جولائی2026ء) ینگ پاکستانیز آرگنائزیشن، نظریہ پاکستان فورم ملتان، پنجاب گروپ آف کالجز ملتان ریجن اور گلوبل وژن فار انکلیوسو پروگریس کے اشتراک سے یونیورسٹی آف سینٹرل پنجاب (UCP) ملتان کیمپس میں مادرِ ملت محترمہ فاطمہ جناحؒ کی 59ویں برسی کے موقع پر "مادرِ ملت کانفرنس و ایوارڈز 2026" کا انعقاد کیا گیا۔

تقریب میں ماہرین تعلیم، سماجی شخصیات، اساتذہ، طلبہ اور مختلف شعبہ ہائے زندگی سے تعلق رکھنے والے افراد نے شرکت کی۔ تقریب سے ریجنل ڈائریکٹر پنجاب گروپ آف کالجز پروفیسر اسامہ بشیر قریشی، صدر نظریہ پاکستان فورم ملتان پروفیسر ڈاکٹر حمید رضا صدیقی، سابق چیئرمین پنجاب اوورسیز پاکستانیز کمیشن مخدوم شعیب اکمل ہاشمی، پروفیسر ڈاکٹر محمد عاصم رجوانہ، پروفیسر ڈاکٹر ریاض حسین اور صدر ینگ پاکستانیز آرگنائزیشن نعیم اقبال نعیم نے خطاب کیا۔

(جاری ہے)

مقررین نے کہا کہ مادرِ ملت محترمہ فاطمہ جناحؒ نے تحریک پاکستان، جمہوریت، آئین کی بالادستی اور خواتین کے حقوق کے لیے تاریخی خدمات انجام دیں۔ انہوں نے کہا کہ فاطمہ جناحؒ کی شخصیت، دیانت داری، اصول پسندی اور حب الوطنی نوجوان نسل، خصوصاً طالبات کے لیے مشعلِ راہ ہے۔ مقررین کا کہنا تھا کہ جو قومیں اپنے قومی ہیروز کو فراموش کر دیتی ہیں وہ ترقی کی دوڑ میں پیچھے رہ جاتی ہیں، اس لیے نئی نسل کو قائداعظم محمد علی جناحؒ، مادرِ ملت فاطمہ جناحؒ اور دیگر اکابرینِ پاکستان کی جدوجہد سے آگاہ کرنا وقت کی اہم ضرورت ہے۔

صدر ینگ پاکستانیز آرگنائزیشن نعیم اقبال نعیم نے کہا کہ تنظیم مستقبل میں بھی قومی شخصیات کی خدمات کو اجاگر کرنے، نوجوانوں میں حب الوطنی، قائدانہ صلاحیتوں اور قومی شعور بیدار کرنے کے لیے ایسی مثبت سرگرمیوں کا انعقاد جاری رکھے گی۔ تقریب کے اختتام پر مختلف شعبوں میں نمایاں خدمات انجام دینے والے اساتذہ کو "مادرِ ملت ایوارڈز 2026" اور تعریفی اسناد سے نوازا گیا جبکہ محترمہ فاطمہ جناحؒ اور دیگر اکابرینِ پاکستان کے ایصالِ ثواب کے لیے خصوصی دعا بھی کرائی گئی۔