پاکستاسن کے آئی ٹی کے شعبے نے برآمدات میں ایک نئی تاریخ رقم کر دی

مالی سال 26-2025 میں پاکستان کی آئی ٹی برآمدات ریکارڈ 4.5 ارب ڈالر تک پہنچ گئیں

منگل 14 جولائی 2026 17:19

پاکستاسن کے آئی ٹی کے شعبے نے برآمدات میں ایک نئی تاریخ رقم کر دی

کراچی(اُردو پوائنٹ اخبارتازہ ترین - این این آئی۔ 14 جولائی2026ء) پاکستان کے انفارمیشن ٹیکنالوجی (آئی ٹی) کے شعبے نے برآمدات میں ایک نئی تاریخ رقم کر دی ہے۔سرکاری اعداد و شمار کے مطابق عالمی منڈیوں تک پاکستانی آئی ٹی شعبے کی وسیع رسائی کے باعث برآمدات اور ملکی زرِ مبادلہ کے ذخائر میں نمایاں اضافہ ریکارڈ کیا گیا ہے۔مالی سال 26-2025 میں پاکستان کی آئی ٹی برآمدات ریکارڈ 4.5 ارب ڈالر تک پہنچ گئی ہیں، جو گزشتہ مالی سال کے 3.475 ارب ڈالر کے مقابلے میں تقریباً 29 فیصد زیادہ ہے۔

آئی ٹی برآمدات میں اس شاندار اضافے کو سافٹ ویئر ڈویلپمنٹ، بزنس پراسیس آؤٹ سورسنگ (BPO)، سافٹ ویئر بطور سروس (SaaS) اور گیمنگ کے شعبوں میں ہونے والی غیر معمولی ترقی سے بڑی مدد ملی ہے۔پاکستانی آئی ٹی کمپنیوں نے روایتی منڈیوں سے ہٹ کر جاپان اور سنگاپور سمیت ایشیا پیسیفک کی نئی مارکیٹوں میں اپنی رسائی بڑھائی ہے، جس سے برآمدی آمدنی میں نمایاں اضافہ ہوا۔

(جاری ہے)

اس سلسلے میں چھوٹے اور درمیانے درجے کے ٹیک اداروں (SMEs) کی نئی عالمی مارکیٹس میں توسیع نے انتہائی اہم کردار ادا کیا ہے۔معاشی و کاروباری ماہرین کا کہنا ہے کہ پاکستانی ڈیجیٹل سروسز کی عالمی سطح پر بڑھتی ہوئی طلب اور نئی مارکیٹوں میں پیش رفت ہی آئی ٹی برآمدات میں اضافے کی بنیادی وجہ ہے۔ پاکستان کی آئی ٹی اور ڈیجیٹل سروسز میں یہ شاندار پیش رفت عالمی منڈیوں میں ملکی برانڈ پر بڑھتے ہوئے اعتماد اور مضبوط ہوتے ہوئے بین الاقوامی معاشی روابط کی واضح عکاس ہے۔