بد انتظامی نے باران رحمت کوباران زحمت بنادیا ‘چوہدری محمد سرور

ہرسال شدیدمالی نقصانات کے باوجود نکاسی آب کے نظام کواپ گریڈنہیںکیاجاتا

بدھ 22 جولائی 2026 22:41

بد انتظامی نے باران رحمت کوباران زحمت بنادیا ‘چوہدری محمد سرور

لاہور(اُردو پوائنٹ اخبارتازہ ترین - این این آئی۔ 22 جولائی2026ء) پنجاب کے سابق گورنراورقومی مفاہمت کے علمبردار چوہدری محمدسرورنے کہا ہے کہ ارباب اقتدار واختیار کی مجرمانہ بد انتظامی اورنااہلی نے بدقسمتی سے باران رحمت کوباران زحمت بنادیا۔قدرت کی اس نایاب نعمت کی ناقدری کاڈس کریڈٹ نادان حکمرانوں سے کوئی نہیں چھین سکتا۔بارشوں کے دوران نظام حیات معطل ہوجاتا ہے، شہری اپنے گھروں اوردفاتر میں محصورہوجاتے ہیں ۔

ہرسال ہونیوالی بارشوں کے نتیجہ میں سرکاری اورشہری املاک کو شدید نقصان پہنچتا ہے لیکن اس کے باوجود نکاسی آب کے نظام کواپ گریڈنہیںکیاجاتا ۔وہ ڈیوائن گارڈن میں شہریوں کے مختلف وفود سے بات چیت کررہے تھے ۔چوہدری محمدسرور نے مزید کہا کہ پاکستان ایک زرعی ملک ہے جویقینا بارش کے بیش قیمت پانی یعنی آب حیات کے ضیاع کامتحمل نہیں ہوسکتا۔

(جاری ہے)

بارشوں کے پانیوں کو جدیدانداز سے محفوظ بنایااور زراعت سمیت مختلف قومی ضروریات کیلئے استعمال کیاجائے ۔انہوں نے کہا کہ ہرسال مون سون کے دوران شہروں اورشاہراہوں کے زیرآب آنے سے ملک اور شہریوں کوناقابل تلافی مالی نقصان پہنچتا ہے ۔ایک مون سون کے بعد آئندہ مون سون تک ہاتھ پرہاتھ دھڑے بیٹھے رہنا یہ کہاں کی گڈ گورننس ہے ۔انہوں نے کہا کہ ہربرس مون سون کے دوران محض ارباب اقتدارواختیار کے فوٹو شوٹ سے نکاسی آب کے بحران کاسدباب نہیں ہوسکتا ۔

نکاسی آب کے نظام کی بدترین ناکامی کے نتیجہ میں خطیرسرمایہ سے تعمیر ہونیوالی شاہراہیں بری طرح ٹوٹ جاتی ہیں۔انہوں نے کہا کہ بدقسمتی سے امسال بھی سیلاب دستک دے رہا ہے لیکن خوابیدہ حکمران بیدار ہونے کیلئے تیارنہیں۔بھارت کے انتہاپسند حکمرانوں سے کچھ بعید نہیں وہ بھی ہمیشہ کی طرح دریائو ں میں پانی چھوڑسکتے ہیں۔ انہوں نے کہا کہ حکومت بروقت اورموثراقدامات کے بغیر ممکنہ سیلاب کے آگے بندنہیں باندھ سکتی ۔