پی ایچ ایف نے جنوبی کوریا ہاکی فیڈریشن کی جانب سے بھیجی گئی دعوت قبول کر لی

اتوار 2 اگست 2026 17:12

لاہور (اُردو پوائنٹ اخبارتازہ ترین - اے پی پی۔ 02 اگست2026ء) پاکستان ہاکی فیڈریشن (پی ایچ ایف) نے جنوبی کوریا ہاکی فیڈریشن کی جانب سے بھیجی گئی باضابطہ دعوت قبول کر لی ہے۔ ایشیئن گیمز کے لیے جاپان روانگی سے قبل قومی ہاکی ٹیم 8 ستمبر سے 15 ستمبر 2026 تک جنوبی کوریا میں بین الاقوامی میچوں کی سیریز اور تربیتی سیشنز میں شرکت کرے گی۔یہ دورہ ایف آئی ایچ ہاکی ورلڈ کپ اور ایشیئن گیمز کے درمیانی وقفے میں ہوگا، جس سے قومی ٹیم کو ایشیئن گیمز جیسے اہم ایونٹ سے قبل جنوبی کوریا کی مضبوط ٹیم کے خلاف بہترین حریفانہ ماحول اور بین الاقوامی میچ پریکٹس میسر آئے گی۔

سیریز کا حتمی شیڈول اور دیگر انتظامات جنوبی کوریا ہاکی فیڈریشن کی مشاورت سے طے کیے جا رہے ہیں، جن کا مکمل اعلان جلد کر دیا جائے گا۔

(جاری ہے)

پاکستان ہاکی فیڈریشن کے صدر محی الدین احمد وانی نے دعوت کا خیرمقدم کرتے ہوئے کہا کہ ہم جنوبی کوریا ہاکی فیڈریشن کے اس اقدام کے مشکور ہیں۔ یہ سیریز ہمارے کھلاڑیوں کوایشیئن گیمز کے درمیان بہترین فارم برقرار رکھنے اور عالمی سطح کا تجربہ حاصل کرنے کا شاندار موقع فراہم کرے گی۔

انہوں نے کہاکہ یہ میچز ایشیئن گیمز کی تیاریوں میں اہم پیش رفت ثابت اور دونوں ممالک کے درمیان کھیل کے روابط کو مزید مضبوط کریں گے۔"پاکستان ہاکی فیڈریشن نے اس عزم کا اعادہ کیا ہے کہ بین الاقوامی مقابلوں میں ملک کی بہترین نمائندگی کے لیے قومی ٹیم کو تمام ممکنہ اور معیارِ اول کی سہولیات و مشقیں فراہم کی جاتی رہیں گی۔