uپنجاب میں پرندوں کے غیر قانونی شکار و کاروبار پر سات چالان

ضلاہور میں فلیپ شیل ٹرٹل کی آن لائن تجارت پر کارروائی، درجنوں پرندے بازیاب س175 کنال سرکاری اراضی واگزار، پانچ ملزمان کو ڈیڑھ لاکھ روپے جرمانہ، ترجمان

اتوار 9 اگست 2026 19:10

e لاہور (اُردو پوائنٹ اخبارتازہ ترین - آن لائن۔ 09 اگست2026ء) سینئر وزیر پنجاب مریم اورنگزیب کی زیرقیادت محکمہ تحفظ جنگلی حیات و پارکس پنجاب کا صوبہ بھر میں جنگلی حیات کے غیر قانونی شکار اور کاروبار کے خلاف کریک ڈاؤن جاری ہے۔ وائلڈ لائف رینجرز نے لاہور میں فلیپ شیل ٹرٹل کی آن لائن تجارت اور پنجاب میں جنگلی پرندوں کے غیر قانونی شکار و کاروبار کے خلاف کارروائی کرتے ہوئے سات چالان کیے، درجنوں تحفظ شدہ جنگلی پرندے بازیاب کرائے جبکہ 175 کنال سرکاری اراضی ناجائز قابضین سے واگزار کرالی۔

تفصیلات کے مطابق ایڈیشنل چیف وائلڈ لائف رینجر سینٹرل زون مدثر حسن کی ہدایت پر ڈپٹی چیف وائلڈ لائف رینجر لاہور ریجن سخی محمد جوئیہ کی سربراہی میں اسسٹنٹ چیف وائلڈ لائف رینجر محمد وسیم نے تحصیل شالیمار لاہور میں فلیپ شیل ٹرٹل کی آن لائن تجارت میں ملوث ایک ملزم کو گرفتار کرکے نایاب ٹرٹل برآمد کر لیا۔

(جاری ہے)

ملزم کے خلاف تھانہ باغبانپورہ میں مقدمہ درج کرایا گیا۔

اسی طرح تحصیل لاہور کینٹ میں جنگلی پرندوں کے ایک نیٹر کے خلاف تھانہ برکی ہڈیارہ میں ایف آئی آر درج کرائی گئی، جبکہ تحصیل چونیاں میں جنگلی پرندوں کے ایک غیر قانونی شکاری کو 20 ہزار روپے جرمانہ کیا گیا۔بہاولنگر میں اسسٹنٹ چیف وائلڈ لائف رینجر عروج ظہیر نے ائرگن کے ساتھ جنگلی کبوتروں کے دو غیر قانونی شکاریوں کو گرفتار کرکے 40 ہزار روپے جرمانہ کیا۔

ایک اور کارروائی میں تحصیل منچن آباد میں سرچ وارنٹ کے بعد چھاپہ مار کر چار جنگلی طوطے، ایک را طوطا اور ایک بھورا تیتر برآمد کرکے ملزم کے خلاف ایف آئی آر درج کرائی گئی۔راجن پور میں اسسٹنٹ چیف وائلڈ لائف رینجر صائمہ محسن نے بٹیر کے شکار کیلئے استعمال ہونے والے دو غیر قانونی نیٹنگ گئرز برآمد کرکے ملزم کے خلاف قانونی کارروائی شروع کر دی۔

اسی طرح دو مختلف کارروائیوں کے دوران اسسٹنٹ چیف وائلڈ لائف رینجر مرزا عابد حسین نے جنگلی پرندوں کی غیر قانونی تجارت میں ملوث دو ملزمان کو گرفتار کرکے 90 ہزار روپے جرمانہ کیا۔کلرکہار میں وائلڈ لائف لائن کلرکہار، کمانڈ اینڈ کنٹرول سینٹر سالٹ رینج اور وائلڈ لائف پروٹیکشن سینٹر کیلئے مختص زیرقبضہ 174 کنال 17 مرلے سرکاری اراضی بھی ناجائز قابضین سے واگزار کرالی گئی۔