منہاج القرآن لاہور کا استقبال ربیع الاول کے جلوسوں کا شیڈول جاری

لاہور (اُردو پوائنٹ اخبارتازہ ترین - اے پی پی۔ 10 اگست2026ء) تحریک منہاج القرآن لاہور کے زیراہتمام استقبالِ ربیع الاول کے سلسلے میں مشعل بردار جلوسوں کی تیاریاں تیزی سے جاری ہیں۔ اس حوالے سے پیر کے روز یہاں مرکزی سیکرٹریٹ لاہور میں ایک اہم اجلاس صدر تحریک منہاج القرآن لاہور اقبال حسین باجوہ کی زیرصدارت منعقد ہوا، جس میں لاہور میں ہونے والے استقبالِ ربیع الاول کے مشعل بردار جلوسوں کے شیڈول، روٹس اور انتظامی امور کا جائزہ لیا گیا اور مختلف جلوسوں کے روٹس کو حتمی شکل دی گئی۔

اجلاس میں بتایا گیا کہ لاہور کے مختلف ٹاونز اور یونین کونسلز میں 13 سے26 اگست 2026 تک 100 سے زائد مقامات سے استقبالِ ربیع الاول کے مشعل بردار جلوس نکالے جائیں گے۔ ان جلوسوں میں تحریک منہاج القرآن، منہاج القرآن علما کونسل دیگر فورمز کے مرکزی، صوبائی اور ضلعی عہدیداران و کارکنان شریک ہوں گے۔

(جاری ہے)

استقبالِ ربیع الاول کے مشعل بردار جلوس مغلپورہ، رائیونڈ، شاہدرہ، داروغہ والا، بھاٹی گیٹ سمیت لاہور کے دیگر علاقوں سے نکالے جائیں گے۔

13 اگست( جمعرات) عزیز بھٹی ٹاون زون سے بعد نمازِ مغرب صدر تحریک منہاج القرآن عزیز بھٹی ٹاون شہباز حسین قادری کی زیرقیادت عظیم الشان استقبالِ ربیع الاول مشعل بردار جلوس نکالا جائے گا، جس میں ناظم اعلی تحریک منہاج القرآن خرم نواز گنڈاپور سمیت مرکزی، صوبائی اور ضلعی عہدیداران، تاجر برادری، وکلا، انجینئرز، ڈاکٹرز اور مختلف شعبہ ہائے زندگی سے تعلق رکھنے والے ہزاروں افراد شرکت کریں گے۔

اجلاس میں فیصلہ کیا گیا کہ استقبالِ ربیع الاول کے جلوسوں میں عوام کے ساتھ ساتھ تاجر برادری، مزدوروں، کسانوں، وکلا، طلبہ، سیاسی، سماجی اور مذہبی رہنماوں کو بھی خصوصی دعوت دی جائے گی ۔اجلاس سے خطاب کرتے ہوئے صدر تحریک منہاج القرآن نے کہا کہ استقبالِ ربیع الاول کے مشعل بردار جلوس محبتِ رسولؐ کے اظہار اور تجدیدِ عہد کا ذریعہ ہیں۔

تحریک منہاج القرآن لاہور کے زیراہتمام شہر بھر میں مشعل بردار جلوسوں کے ساتھ ضیافتِ میلاد کا بھی اہتمام کیا جائے گا۔انہوں نے کہا کہ مینارِ پاکستان پر ہونے والی 43 ویں عالمی میلاد کانفرنس کی تیاریاں بھی شروع کر دی گئی ہیں، جس میں لاہور سے لاکھوں افراد شرکت کریں گے۔انہوں نے کہا کہ محسنِ انسانیت حضرت محمد مصطفیؐ کی ولادتِ باسعادت سے بڑھ کر کوئی خوشی نہیں۔

بعثتِ محمدیؐ اللہ رب العزت کی عظیم نعمت ہے اور قرآنِ مجید اللہ تعالی کی نعمتوں پر خوشی منانے اور شکر ادا کرنے کی تعلیم دیتا ہے۔ حضور نبی اکرمؐ پوری کائنات کے لیے اللہ تعالیٰ کی سب سے بڑی نعمت اور رحمت ہیں۔انہوں نے کہا کہ استقبالِ ربیع الاول کے پروگرامز کا مقصد نئی نسل کو سیرتِ طیبہ، محبتِ رسولؐۖ، اخلاقِ حسنہ، امن، رواداری اور اتحادِ امت کے پیغام سے روشناس کرانا ہے۔ میلادِ مصطفیؐ کی خوشیاں منانا دراصل حضور نبی اکرم ۖ سے اپنی محبت اور وابستگی کا اظہار ہے۔اجلاس میں منہاج القرآن لاہور کے ناظم علی رحمت، علامہ احسن اویس، کیپٹن (ر) عبدالمجید، میاں ممتاز حسین، ذوالفقار علی اعوان، ریحان چوہدری سمیت دیگر زونل عہدیداران نے شرکت کی۔