سوات ،اقلیتوں کےقومی دن کے موقع پر نمایاں کارکردگی کا مظاہرہ کرنے والے اقلیتی برداری کے طلبہ میں شیلڈز تقسیم

منگل 11 اگست 2026 19:51

پشاور (اُردو پوائنٹ اخبارتازہ ترین - اے پی پی۔ 11 اگست2026ء) اقلیتوں کے قومی دن کے موقع پر ضلعی انتظامیہ سوات کی جانب سے اقلیتی برادری کے ساتھ اظہارِ یکجہتی اور تعلیمی میدان میں نمایاں کارکردگی کا مظاہرہ کرنے والے طلبہ کی حوصلہ افزائی کے لیے تقریب کا انعقاد ڈپٹی کمشنر آفس سوات کے کانفرنس روم میں کیا گیا۔ڈپٹی کمشنر سوات کے دفتر سے جاری بیان کے مطابق اس موقع پر اقلیتی کمیٹی کے اراکین اور حالیہ میٹرک کے امتحان میں نمایاں نمبر حاصل کرنے والے اقلیتی برداری سےتعلق رکھنے والے طلبہ نے ایڈیشنل ڈپٹی کمشنر ریلیف و ہیومن رائٹس سوات نعمت اللہ خان سے ملاقات کی۔

اس موقع پرریجنل سپورٹس آفیسر ملاکنڈ ڈویژن حضرت اللہ خان خٹک بھی موجود تھے۔تقریب کے دوران میٹرک امتحان میں نمایاں تعلیمی کارکردگی کا مظاہرہ کرنے والے اقلیتی طلبہ میں شیلڈز تقسیم کی گئیں ۔

(جاری ہے)

اس موقع پر ایڈیشنل ڈپٹی کمشنر ریلیف و ہیومن رائٹس سوات نعمت اللہ خان نے کہا کہ اقلیتی برادری پاکستان کا اہم حصہ ہے اور ملکی ترقی، امن و خوشحالی میں ان کا کردار قابلِ قدر ہے۔

انہوں نے کہا کہ ضلعی انتظامیہ سوات تمام شہریوں کو بلاامتیاز مساوی مواقع اور بنیادی حقوق کی فراہمی کے لیے پرعزم ہے جبکہ باصلاحیت نوجوانوں کی حوصلہ افزائی کا سلسلہ بھی جاری رکھا جائے گا۔ریجنل سپورٹس آفیسر ملاکنڈ ڈویژن حضرت اللہ خان خٹک نے نمایاں کارکردگی دکھانے والے طلبہ کو مبارکباد دیتے ہوئے کہا کہ نوجوان ملک کا قیمتی سرمایہ ہیں۔

انہوں نے کہا کہ تعلیم اور کھیل سمیت مختلف شعبوں میں نوجوانوں کی صلاحیتوں کو اجاگر کرنے کے لیے ان کی حوصلہ افزائی اور مناسب مواقع کی فراہمی ناگزیر ہے۔اس موقع پر اقلیتی ایسوسی ایشن کے صدر پردیپ کمار اور دیگر اراکین نے ضلعی انتظامیہ سوات کاشکریہ ادا کرتے ہوئے کہا کہ انتظامیہ نے اقلیتی برادری کی فلاح و بہبود، مسائل کے حل اور مختلف سطحوں پر ان کی حوصلہ افزائی کے لیے ہمیشہ تعاون کیا ہے۔ انہوں نے امید ظاہر کی کہ اقلیتی برادری کی معاونت اور حوصلہ افزائی کا یہ سلسلہ آئندہ بھی جاری رہے گا۔طلبہ نے بھی ضلعی انتظامیہ سوات کی جانب سے ان کی تعلیمی کامیابی کو سراہنے اور حوصلہ افزائی کرنے پر اظہارِ تشکر کیا۔