چیئرمین پی ٹی آئی بیرسٹر گوہر نے عمران خان سے ملاقات کی تردید کر دی

15 اکتوبر 2025 کے بعد سے میری عمران خان سے کوئی ملاقات نہیں ہوئی، میں درخواست کروں گا کہ مجھے ملاقات کی اجازت دی جائے، چیئرمین پی ٹی آئی بیرسٹر گوہر خان

ثنااللہ ناگرہ جمعرات 13 اگست 2026 00:44

اسلام آباد ( اردوپوائنٹ اخبار تازہ ترین ۔ انٹرنیشنل پریس ایجنسی ۔ 12 اگست 2026ء ) چیئرمین پی ٹی آئی بیرسٹر گوہر نے عمران خان سے ملاقات کی تردید کر دی۔ نجی ٹی وی جیونیوز سے گفتگو کرتے ہوئے بیرسٹر گوہر نے بانی پی ٹی آئی سے ملاقات کی تردید کرتے ہوئے کہا کہ 15اکتوبر 2025 کے بعد سے عمران خان سے نہیں ملاقات نہیں ہوئی، اور بانی سے ملاقات کی سختی سے تردید کرتا ہوں۔

انہوں نے کہا کہ میں نے عمران خان سے ملاقات کیلئے بار بار درخواستیں دیں لیکن اس کے باوجود ملنے کی پیشکش یا اجازت نہیں دی گئی، اب پھر ملاقات کیلئے درخواست کروں گا کہ مجھے بانی سے ملاقات کی اجازت دی جائے، اہل خانہ اور وکلا کو بھی بانی سے ملنے دیا جائے۔ یاد رہے پیپلز پارٹی کے سینئر رہنماء سلیم مانڈوی والا کا کہنا ہے کہ عمران خان بالکل ٹھیک ہیں، بیرسٹر گوہر کی ان سے ملاقات بھی ہوئی ہے۔

(جاری ہے)

پارلیمنٹ کے باہر انہوں نے میڈیا سے گفتگو کرتے ہوئے کہا کہ مجھے پی ٹی آئی کے لانگ مارچ کے حوالے سے کسی ڈیل یا معاملات طے ہونے کا کوئی علم نہیں، کبھی معاملات بنتے ہیں کبھی نہیں بنتے۔ مجھے لگتا ہے عمران خان کی صحت سے متعلق بھی خبریں غلط چل رہی ہیں، میں کل کہیں تھا تو مجھے بتایا گیا کہ بیرسٹر گوہر تو کل عمران خان کو مل کر آئے ہیں۔ مجھے کسی نے بتایا ہے کہ اور بیرسٹر گوہر کا نام آیا ہے۔

انہوں نے کہا کہ انہیں کسی نے بتایا ہے کہ عمران خان سے ملاقات ہوئی ہے۔

دوسری جانب تحریک انصاف کے سیکریٹری جنرل بیرسٹر سلمان اکرم راجہ نے کراچی میں پی ٹی آئی سندھ کے صدر حلیم عادل شیخ سے ملاقات کی، جس میں ملکی سیاسی صورتحال، عمران خان کی رہائی، ان کی صحت، 27 ستمبر کے احتجاج اور ملک میں گندم کے بحران سمیت اہم امور پر تفصیلی تبادلہ خیال کیا گیا۔

میڈیا سے گفتگو کرتے ہوئے بیرسٹر سلمان اکرم راجہ نے کہا کہ عمران خان کی صحت کے حوالے سے غیر مصدقہ اطلاعات آرہی ہیں عمران خان کی صحت پر کوئی سمجھوتہ نہیں عمران خان کی صحت کی خبروں پر پوری قوم میں شدید تشویش پائی جاتی ہے، پوری قوم کا مطالبہ ہے کہ انہیں فوری طور پر اسپتال منتقل کیا جائے۔ انہوں نے کہا کہ عمران خان کی صحت سے متعلق اطلاعات پر ہم نے عدالت سے رجوع کیا ہے، جبکہ گزشتہ روز سپریم کورٹ میں رجسٹرار سے ملاقات ہوئی، جہاں مقدمات آئندہ ہفتے مقرر کرنے کی یقین دہانی کرائی گئی ہے۔