پاکستان ہمارے بزرگوں کی بے مثال قربانیوں کا ثمر ہے، ڈاکٹر فردوس عاشق اعوان

جمعہ 14 اگست 2026 22:05

سیالکوٹ (اُردو پوائنٹ اخبارتازہ ترین - اے پی پی۔ 14 اگست2026ء) جشنِ آزادی ہمیں اپنے بزرگوں کی لازوال قربانیوں، جدوجہد تحریکِ پاکستان کے مقاصد یاد کرنے کے ساتھ ساتھ پاکستان کی ترقی، استحکام،خوشحالی ، خودمختاری کے لیے اپنے عزم کی تجدید کا موقع فراہم کرتا ہے۔ پاکستان ہمارے بزرگوں کی بے مثال قربانیوں کا ثمر ہے، ہمیں اس عظیم نعمت کی قدر کرتے ہوئے ملکی ترقی و خوشحالی میں اپنا مثبت کردار ادا کرنا چاہیے۔

ان خیالات کا اظہار سابق وفاقی وزیر ڈاکٹر فردوس عاشق اعوان نےجشنِ آزادی کے موقع پر منعقدہ تقریب سےخطاب کرتے ہوئے کیا۔ اپنے خطاب میں انہوں نے مزید کہا کہ پاکستان کی آزادی کے لیے ہمارے آباؤ اجداد نے بے شمار قربانیاں دیں، ہجرت کی صعوبتیں برداشت کیں اور ایک آزاد وطن کے حصول کے لیے اپنی جانوں کے نذرانے پیش کیے۔

(جاری ہے)

آج ہماری ذمہ داری ہے کہ ہم ان قربانیوں کو یاد رکھیں اور پاکستان کو قائداعظم محمد علی جناحؒ کے تصور کے مطابق ایک مضبوط، خوشحال اور ترقی یافتہ ملک بنانے کے لیے متحد ہو کر کام کریں۔

انہوں نے کہا کہ آزادی صرف جشن منانے کا نام نہیں بلکہ یہ ہمیں اپنے قومی فرائض اور ذمہ داریوں کا احساس بھی دلاتی ہے۔ ہمیں ذاتی، گروہی اور سیاسی اختلافات سے بالاتر ہو کر پاکستان کے وسیع تر مفاد کو مقدم رکھنا ہوگا۔ اتحاد، نظم و ضبط، محنت، دیانت اور باہمی احترام کو فروغ دے کر ہی ملک کو ترقی کی راہ پر گامزن کیا جا سکتا ہے۔سابق وفاقی وزیر نے کہا کہ نوجوان پاکستان کا روشن مستقبل ہیں، انہیں تعلیم، ہنر اور مثبت سرگرمیوں کے ذریعے ملکی تعمیر و ترقی میں اپنا کردار ادا کرنے کے مواقع فراہم کرنا وقت کی اہم ضرورت ہے۔

خواتین بھی ملکی ترقی میں اہم کردار ادا کر رہی ہیں اور انہیں سیاسی، سماجی، معاشی اور تعلیمی میدان میں آگے بڑھنے کے مساوی مواقع فراہم کیے جانے چاہئیں۔ڈاکٹر فردوس عاشق اعوان نے کہا کہ آج کے دن ہمیں اس عزم کا اعادہ کرنا چاہیے کہ ہم پاکستان کی سلامتی، خودمختاری اور ترقی کے لیے اپنی تمام تر صلاحیتیں بروئے کار لائیں گے۔ انہوں نے شرکاء کو جشنِ آزادی کی مبارکباد دیتے ہوئے کہا کہ پاکستان ہمیشہ قائم و دائم رہے گا اور قوم متحد ہو کر ملک کو مزید مضبوط اور خوشحال بنانے میں اپنا کردار ادا کرے گی۔اس موقع پر شرکاء نے قومی پرچم لہرایا اور پاکستان زندہ باد کے نعرے لگائے، جبکہ ملک کی سلامتی، استحکام، ترقی اور خوشحالی کے لیے خصوصی دعا بھی کی گئی۔