ْاو زیڈ ٹی کے مبینہ غلط استعمال کا نوٹس، اسٹیٹ بینک اور متعلقہ اداروں نے حسابات طلب کرلیے

بلدیاتی ملازمین کو تنخواہوں، پنشن اور واجبات میں اضافے کی ادائیگی یقینی بنائی جائے، سید ذوالفقار شاہ

اتوار 16 اگست 2026 21:35

کراچی(اُردو پوائنٹ اخبارتازہ ترین - این این آئی۔ 16 اگست2026ء) آل پاکستان لوکل گورنمنٹ ورکرز فیڈریشن کے اعلیٰ سطحی رابطوں کے بعد سندھ کے بلدیاتی اداروں میں او زیڈ ٹی گرانٹ کے مبینہ غلط استعمال کا اسٹیٹ بینک، محکمہ خزانہ اور لوکل فنڈ آڈٹ نے نوٹس لے لیا ہے۔آل پاکستان لوکل گورنمنٹ ورکرز فیڈریشن کے مرکزی چیئرمین و صدر سندھ سید ذوالفقار شاہ نے لاڑکانہ میونسپل کارپوریشن محنت کش لیبر یونین سی بی اے کے صدر اور فیڈریشن کے صوبائی ڈپٹی جنرل سیکریٹری قلندر بخش شاہانی سے ملاقات کے دوران کہا کہ متعلقہ اداروں کی جانب سے خطوط جاری کرکے بلدیاتی اداروں کے حسابات طلب کیے جا رہے ہیں۔

انہوں نے کہا کہ سندھ کے بیشتر بلدیاتی ملازمین گزشتہ برسوں کے دوران تنخواہوں اور پنشن میں ہونے والے اضافے سمیت دیگر واجبات کی ادائیگی سے محروم ہیں، جس پر فیڈریشن نے اعلیٰ سطح پر رابطے شروع کیے ہیں۔

(جاری ہے)

سید ذوالفقار شاہ نے کہا کہ بلدیاتی ملازمین کو ان کے حقوق اور مراعات دلوانا فیڈریشن کی اولین ترجیح ہے اور کسی صورت ان کے جائز حقوق سے دستبردار نہیں ہوں گے۔

انہوں نے کہا کہ او زیڈ ٹی گرانٹ صرف تنخواہوں، پنشن اور واجبات کی ادائیگی کے لیے استعمال ہونی چاہیے۔ انہوں نے خبردار کیا کہ گرانٹ کو دیگر مقاصد کے لیے استعمال کرنے والے عوامی نمائندوں اور افسران اپنی روش سے باز آجائیں، بصورت دیگر ان کے خلاف قانونی کارروائی کی جائے گی۔انہوں نے مطالبہ کیا کہ او زیڈ ٹی گرانٹ سے تنخواہوں، پنشن میں کیے گئے اضافے اور دیگر واجبات کی فوری ادائیگی یقینی بنائی جائے۔اس موقع پر قلندر بخش شاہانی نے بھی سید ذوالفقار شاہ کے بڑے بھائی سید علمدار حسین شاہ کے انتقال پر تعزیت کی اور فاتحہ خوانی کی۔