پنجاب کے مختلف اضلاع میں صاف پانی کی فراہمی کے منصوبوں کا جائزہ

لاہور(اردوپوائنٹ اخبارتازہ ترین-انٹرنیشنل پریس ایجنسی۔17 اگست ۔2026 ) وزیراعلیٰ پنجاب مریم نواز شریف نے صاف پینے کے پانی کی فراہمی کے حوالے سے مسلسل پانچویں اجلاس کی صدارت کی، جس میں پنجاب کے مختلف اضلاع میں پانی کی فراہمی یقینی بنانے کے لیے مجوزہ اقدامات کا جائزہ لیا گیا اجلاس میں چکوال، راولپنڈی، راجن پور، فیصل آباد، مری اور اٹک میں پانی کی فراہمی کے لیے پائپ لائن منصوبوں کا جائزہ لیا گیا اجلاس نے اصولی طور پر چکوال کے آٹھ ایسے دیہات میں پانی کی فراہمی کو ترجیح دینے پر اتفاق کیا جہاں پانی کی شدید قلت ہے راجن پور، جام پور، چک شگاری اور ڈاجل میں پائلٹ بنیادوں پر پانی کی فراہمی کے منصوبوں کی تجویز بھی زیر غور آئی۔

(جاری ہے)

اجلاس میں چک جھمرہ اور فیصل آباد کے مضافاتی علاقوں میں پینے کا پانی فراہم کرنے کے لیے پائلٹ منصوبہ شروع کرنے پر بھی اتفاق کیا گیا. وزیراعلیٰ نے حکام کو آبادی کے تناسب سے پانی کی ضروریات کے حوالے سے قابلِ اعتماد اعداد و شمار مرتب اور ان کی تصدیق کرنے کی ہدایت کی انہوں نے راجن پور میں فوری طور پر 21 واٹر باﺅزرز فراہم کرنے کا حکم دیا جبکہ روجھان میں خوبصورتی اور دیگر ترقیاتی منصوبوں کو تیز کرنے کی بھی ہدایت کی وزیراعلیٰ پنجاب نے مری میں پینے کے پانی کی فراہمی کے لیے واٹر ٹینکس فراہم کرنے اور اس پہاڑی شہر میں پانی کے نئے ذریعے پر کام شروع کرنے کا بھی حکم دیا پنجاب کلین واٹر اتھارٹی اور ڈپٹی کمشنرز نے اجلاس کو مختلف اضلاع میں پانی کی فراہمی کی صورتحال اور جاری منصوبوں کے بارے میں تفصیلی بریفنگ دی. اجلاس کو بتایا گیا کہ چکوال میں 32 واٹر فلٹریشن پلانٹس فعال ہیں جبکہ 237 پلانٹس زیر تعمیر ہیں اس کے علاوہ 15 ماڈل دیہات اور 13 ماڈل دیہات بھی ترقی دیے جا رہے ہیں راولپنڈی میں 246 واٹر فلٹریشن پلانٹس پہلے سے موجود ہیں جبکہ مزید 252 نئے پلانٹس نصب کیے جائیں گے اٹک میں 77 فلٹریشن پلانٹس موجود ہیں، 399 پلانٹس تکمیل کے مراحل میں ہیں جبکہ 9 ماڈل دیہات بھی منصوبے میں شامل ہیں راجن پور میں 146 فلٹریشن پلانٹس موجود ہیں جبکہ 191 پلانٹس تکمیل کے مراحل میں ہیں وہاں 12 ماڈل دیہات اور ایک ماڈل گاﺅں بھی منصوبہ بندی میں شامل ہیں. اجلاس کو بتایا گیا کہ مری میں 5 واٹر فلٹریشن پلانٹس پہلے سے موجود ہیں جبکہ 90 پلانٹس تکمیل کے مراحل میں ہیں فیصل آباد میں 343 واٹر فلٹریشن پلانٹس موجود ہیں، جبکہ 4 سطحی پانی صاف کرنے کے پلانٹس اور 180 فلٹریشن پلانٹس زیر تکمیل ہیں وزیراعلیٰ مریم نواز شریف نے کہا کہ عوام کو صاف پینے کا پانی فراہم کرنے کا ان کا عزم غیر متزلزل ہے انہوں نے کہا کہ ہم اس وقت تک آرام سے نہیں بیٹھیں گے جب تک پنجاب کے عوام کو ان کی دہلیز پر صاف پینے کا پانی فراہم نہیں کر دیا جاتا انہوں نے کہا کہ ایسے علاقے جہاں لوگوں کو اپنے سروں اور کندھوں پر پانی اٹھا کر لے جانا پڑتا ہے، حکومت کی ترجیحات میں شامل کیے گئے ہیں وزیراعلیٰ پنجاب نے کہا کہ میں پورے پنجاب میں پانی کی فراہمی کو اپنی ذمہ داری سمجھتی ہوں کیونکہ عوام کی خدمت میرا فرض ہے.