Live Updates

شام کے وزیر خارجہ کا پاکستان کا تاریخی دورہ،دوطرفہ تعلقات میں نئے باب کا آغاز،شامی میڈیا کا خیرمقدم

)علاقائی اورعالمی ممالک پاکستان کے ساتھ سیاسی، معاشی اور سکیورٹی تعاون بڑھانے میں گہری دلچسپی لے رہے ہیں،رپورٹ ۵ یہ دورہ ایک اہم اور حساس وقت میں ہوا ہے جب دونوں ممالک کے تعلقات مزید تعاون کی جانب بڑھ رہے ہیں،شامی مشیر

اتوار 23 اگست 2026 17:55

;اسلام آباد(اُردو پوائنٹ اخبارتازہ ترین - آن لائن۔ 23 اگست2026ء) شام کے وزیر خارجہ کے پاکستان کت تاریخی دورہ کودوطرفہ تعلقات میں نئے باب کا آغازقراردیتے ہوئے شامی میڈیانے بھرپورخیرمقدم کیا ہے اور کہا ہے کہ علاقائی اورعالمی ممالک پاکستان کے ساتھ سیاسی، معاشی اور سکیورٹی تعاون بڑھانے میں گہری دلچسپی لے رہے ہیں۔شامی مشیر محمدالجفال نے کہا کہ یہ دورہ ایک اہم اور حساس وقت میں ہوا ہے جب دونوں ممالک کے تعلقات مزید تعاون کی جانب بڑھ رہے ہیں۔

شامی خبر رساں ادارے سریا عرب نیوز ایجنسی کے مطابق شام کے وزیر خارجہ اسعد حسن الشیبانی کا 19سال بعد پاکستان کا اہم اور پہلا دورہ مکمل ہو گیا ۔دورے کے دوران دمشق اوراسلام آباد کے درمیان سیاسی، سیکیورٹی اوراقتصادی تعاون کو مزید مضبوط بنانے پر تبادلہ خیال کیا گیا۔

(جاری ہے)

سریا عرب نیوز ایجنسی کے مطابق شامی وزیرخارجہ گزشتہ بدھ اعلیٰ سطح وفد کے ہمراہ اسلام آباد پہنچے جسے دوطرفہ تزویراتی تعاون کے نئے دور کا آغازقرار دیا گیا، پاکستان نے شام کی خودمختاری، علاقائی سالمیت اورمقبوضہ گولان کے معاملے پر شام کے مؤقف کی بھرپورحمایت کا اعادہ کیا، پاکستان نے ادلب کے ابو الظہور ہوائی اڈے پر اسرائیلی حملوں کوبین الاقوامی قانون کی خلاف ورزی قراردیتے ہوئے مذمت کی۔

سریا عرب نیوز ایجنسی کے مطابق وزیر خارجہ اسعد حسن الشیبانی نے وزیراعظم شہبازشریف، نائب وزیراعظم اسحاق ڈار،فیلڈ مارشل سید عاصم منیر اوردیگراعلیٰ حکام سے اہم ملاقاتیں کیں،الشیبانی نے ''مکہ مشترکہ دفاعی معاہدے '' پردستخط کا خیرمقدم کیا اور پاکستان کے علاقائی کردارکی تعریف کی،پاکستان اورشام کے درمیان عوامی اور تجارتی روابط بڑھانے کیلئے براہِ راست پروازوں کی بحالی پر تبادلہ خیال ہوا۔

سریا عرب نیوز ایجنسی کے مطابق دمشق یا اسلام آباد میں سرمایہ کاری فورم کے انعقاد اورامریکا ایران کشیدگی کم کرنے میں پاکستان کے کردارپر بات کی گئی۔شامی مشیر محمد الجفال نے نیوزایجنسی سے گفتگو میں کہا کہ یہ دورہ ایک اہم اور حساس وقت میں ہوا ہے جب دونوں ممالک کے تعلقات مزید تعاون کی جانب بڑھ رہے ہیں،دمشق نے ریاض، انقرہ اوراسلام آباد کے ساتھ اپنے تعلقات کوعلاقائی استحکام کے لیے خصوصی اہمیت کا حامل قراردیا۔پاکستان کی جانب سے شام کی خودمختاری اورعلاقائی سالمیت کی حمایت دونوں ممالک کے دیرینہ دوستانہ تعلقات کو مزید مضبوط کرے گی۔