میر رضا کیس، 33 دیگر افراد سے بھی تحقیقات ہورہی ہیں، جبران ناصر

پیر 24 اگست 2026 20:56

کراچی(اُردو پوائنٹ اخبارتازہ ترین - این این آئی۔ 24 اگست2026ء) میر رضا قتل کیس میں مقتول کے اہلخانہ کے وکیل جبران ناصر نے کہا ہے کہ میر رضا جن جن افراد سے رابطے میں تھا، ان سب سے تحقیقات کی جارہی ہیں، صرف ایک شخص تک تفتیش محدود نہیں ہونی چاہیے۔سٹی کورٹ میں میڈیا سے گفتگو کرتے ہوئے جبران ناصر نے کہا کہ پولیس نے محمد احمد کو 30 جولائی کو طلب کیا تھا جبکہ اس سے ایک روز قبل ہی انہوں نے ضمانت کے لیے حلف نامہ کرایا۔

انہوں نے کہا کہ محمد احمد کی درخواست ضمانت ابھی ابتدائی مرحلے میں ہے۔

(جاری ہے)

ان کے مطابق مزید 33 افراد سے بھی تحقیقات کی جارہی ہیں، اگر تحقیقات کا یہی طریقہ رہا تو وہ بھی ضمانت کے لیے عدالت سے رجوع کرسکتے ہیں۔جبران ناصر نے کہا کہ پراسکیوشن نے عدالت میں مؤقف اختیار کیا کہ درخواست گزار درخواست واپس نہیں لینا چاہتا، لہٰذا جب تک چالان پیش نہیں ہوتا اسے ضمانت دی جائے۔

انہوں نے کہا کہ چیف جسٹس سندھ ہائیکورٹ کو پہلے خط اس وقت لکھا گیا تھا جب جوڈیشل کمیشن کا فیصلہ نہیں آیا تھا، اب جوڈیشل کمیشن بننے کی اطلاعات کے بعد نئی درخواست دائر کی گئی ہے۔وکیل نے کہا کہ جوڈیشل کمیشن نہ چالان جمع کراسکتا ہے اور نہ ہی کسی شخص کی فوجداری تفتیش کرسکتا ہے، اس لیے جے آئی ٹی تشکیل دینا ضروری ہے۔