ایف بی آر ہیڈ کوارٹرز میں ریٹیلر سکیم پر آگاہی اجلاس، بلال اظہر کیانی کا چھوٹے تاجروں کے لیے مکمل حکومتی تعاون کا اعادہ

اسلام آباد(اُردو پوائنٹ اخبارتازہ ترین - این این آئی۔ 24 اگست2026ء) وزیر مملکت برائے خزانہ بلال اظہر کیانی نے چھوٹے تاجروں کے لیے مکمل حکومتی تعاون کا اعادہ کرتے ہوئے کہا ہے کہ چھوٹے دکاندار صرف 1 فیصد ٹرن اوور ٹیکس ادا کر کے خود کو رجسٹر کروا سکتے ہیں اور اپنی قانونی ذمہ داری پوری کر سکتے ہیں۔وزیر مملکت برائے خزانہ بلال اظہر کیانی نے ایف بی آر ہیڈ کوارٹرز اسلام آباد میں منعقد سمال شاپ کیپرز سکیم (ریٹیلر سکیم)کے حوالے سے ایک فالو اپ آگاہی اجلاس سے خطاب کیا۔

بلال اظہر کیانی نے سکیم کی بنیادی خصوصیات، جن میں آسان رجسٹریشن کا طریقہ کار، آسان ادائیگی کے اختیارات اور چھوٹے تاجروں کی سہولت کے لیے بنایا گیا خصوصی آپریٹنگ فریم ورک شامل ہیں کو اجاگر کرتے ہوئے اسے ملک کی 79 سالہ تاریخ کی سب سے آسان سکیم قرار دیا۔

(جاری ہے)

انہوںنے کہا کہ یہ سکیم وزیراعظم پاکستان کے وژن اور ہدایات کے مطابق تیار کی گئی ہے۔

وزیر مملکت نے اس سکیم کو تاجروں کے لیے ایک تاریخی موقع قرار دیا کہ وہ اس میں حصہ لیں، اپنے قومی فرض کو پورا کرتے ہوئے ملکی معیشت کو مضبوط بنائیں۔وزیر مملکت کے موقف کی تائید کرتے ہوئے چیئرمین ایف بی آر راشد محمود لنگڑیال نے اس اقدام کے لیے حکومت کے عزم کو دہرایا اور بتایا کہ چھوٹے دکاندار صرف 1 فیصد ٹرن اوور ٹیکس ادا کر کے خود کو رجسٹر کروا سکتے ہیں اور اپنی قانونی ذمہ داری پوری کر سکتے ہیں۔

انہوں نے تاجروں کو ہر ممکن سہولت کی یقین دہانی کرائی اور کہا کہ رجسٹرڈ گرین پلیٹس ٹیکس دہندگان کو ٹیکس کلیکٹرز کی بلاوجہ پوچھ گچھ سے تحفظ فراہم کریں گی، جبکہ عدم تعاون کرنے والے تاجروں کو سخت قانونی کارروائی کا سامنا کرنا پڑے گا۔تقریب کے دوران شرکا کو ایف بی آر کے ڈیجیٹل ایکو سسٹم کا لائیو واک تھرو بھی دکھایا گیا، جس میں ایک مخصوص ویب پورٹل اور آئی او ایس و اینڈرائیڈ کی موبائل ایپس شامل ہیں۔

سوال جواب کے سیشن میں میں ٹیکس کے تخمینے اور رجسٹریشن سے متعلق سوالات کے جوابات دیے گئے۔تاجر رہنمائوں نے آسان ڈیجیٹل ٹولز کا خیرمقدم کیا، مشاورت کے عمل میں اپنی مسلسل شمولیت کی تصدیق کی اور بلال اظہر کیانی کی جانب سے پیش کیے گئے حکومت کے سادہ اور آسان وژن کی مکمل حمایت کا اظہار کیا۔گزشتہ ہفتے سکیم کے باقاعدہ افتتاح کے بعد منعقد ہونے والے اس اجلاس میں ایف بی آر کی اعلی قیادت کے ساتھ ساتھ اہم تاجر رہنماں نے شرکت کی، جن میں اجمل بلوچ (صدر آل پاکستان انجمن تاجران)اور محمد کاشف چوہدری (صدر مرکزی تنظیم تاجران پاکستان)اور دیگر شامل تھے۔