پاکستان کو جدید سائنسی علوم کے ساتھ اسلامی تعلیمات کے فروغ پر خصوصی توجہ دینا ہوگی،فیصل کنڈی

پشاور(اُردو پوائنٹ اخبارتازہ ترین - این این آئی۔ 27 اگست2026ء) گورنر خیبرپختونخوا فیصل کریم کنڈی نے کہا ہے کہ نئی نسل کو جدید تعلیم کے ساتھ ساتھ اعلیٰ اخلاقی اقدار اور کردار سازی سے آراستہ کرنے والے تعلیمی اداروں کا قیام وقت کی اہم ضرورت ہے، تعلیم ہی قومی ترقی اور خوشحالی کی بنیاد ہے۔ایکسپو سینٹر لاہور میں منہاج القرآن یونیورسٹی کی کانووکیشن 2026 سے خطاب کرتے ہوئے گورنر فیصل کریم کنڈی نے کہا کہ پاکستان کو جدید سائنسی علوم کے ساتھ اسلامی تعلیمات کے فروغ پر بھی خصوصی توجہ دینا ہوگی۔

گورنر نے شیخ الاسلام ڈاکٹر محمد طاہرالقادری کی تعلیمی اور علمی خدمات کو سراہتے ہوئے کہا کہ منہاج القرآن یونیورسٹی جدید تعلیم اور دینی علوم کے امتزاج کے ذریعے ملک و قوم کی خدمت کر رہی ہے، یونیورسٹی کے فارغ التحصیل طلبہ مختلف قومی اداروں میں اپنی خدمات انجام دے رہے ہیں۔

(جاری ہے)

فیصل کریم کنڈی نے کہا کہ منہاج القرآن یونیورسٹی میں کالج آف شریعہ اینڈ اسلامک سائنسز 1984 میں قائم کیا گیا، جبکہ آج یونیورسٹی جدید شعبہ جات میں انڈر گریجویٹ اور پوسٹ گریجویٹ پروگرامز کے ساتھ اعلیٰ اسلامی تعلیم بھی فراہم کر رہی ہے۔

گورنر نے کہا کہ تعلیمی اداروں میں مذہبی تعلیم کے ساتھ سائنس، ٹیکنالوجی، تحقیق اور جدید علوم کو بھی فروغ دیا جانا چاہیے، پاکستان پیپلز پارٹی کی قیادت نے ہمیشہ تعلیم کے فروغ کو قومی ترقی کی بنیاد سمجھا ہے۔ انہوں نے کہا کہ پاکستان پیپلز پارٹی اور منہاج القرآن کے درمیان تعلق محض ذاتی یا رسمی نوعیت کا نہیں بلکہ فکری ہم آہنگی اور مساوات پر مبنی ہے، شہید محترمہ بے نظیر بھٹو ڈاکٹر محمد طاہرالقادری کی علمی و تحقیقی خدمات کی قدر کرتی تھیں اور تحریک منہاج القرآن کی تاحیات رکن بھی رہی ہیں۔

گورنر خیبرپختونخوا نے کہا کہ پاکستان اس وقت مشکل اور چیلنجنگ دور سے گزر رہا ہے، تاہم مایوس ہونے کی کوئی وجہ نہیں، ہمیں اجتماعی طور پر گمراہ کن پروپیگنڈے کا مقابلہ کرتے ہوئے قومی اتحاد اور ہم آہنگی کے فروغ میں اپنا کردار ادا کرنا ہوگا۔ انہوں نے کہا کہ جہالت، انتہاپسندی، نفرت اور عدم برداشت کا مقابلہ علم، شعور اور دلیل کے ذریعے کیا جا سکتا ہے، اسلام امن، محبت اور بھائی چارے کا دین ہے، اس کے پیغامِ امن و ہم آہنگی کو فروغ دے کر دہشتگردی سمیت درپیش چیلنجز کا مؤثر انداز میں مقابلہ کیا جا سکتا ہے۔

فارغ التحصیل طلبہ سے خطاب کرتے ہوئے گورنر فیصل کریم کنڈی نے کہا کہ وہ اپنی تعلیم کو صرف ذاتی ترقی تک محدود نہ رکھیں بلکہ اپنے علم کو ملک کی تعمیر و ترقی، انسانیت کی خدمت اور معاشرے میں مثبت تبدیلی کے لیے بروئے کار لائیں۔ گورنر نے فارغ التحصیل طلبہ، بالخصوص گولڈ میڈلسٹ طلبہ اور ان کے والدین کو مبارکباد پیش کی۔ تقریب کے دوران گورنر فیصل کریم کنڈی نے گولڈ میڈلسٹ طلبہ میں انعامات اور اسناد تقسیم کیں۔ بعدازاں منہاج القرآن یونیورسٹی کی جانب سے گورنر خیبرپختونخوا فیصل کریم کنڈی کو یادگاری شیلڈ بھی پیش کی گئی۔