مریم نواز کا دورہٴ لندن؛ نجی چھٹیوں پر سرکاری جہاز کے استعمال پر زلفی بخاری کا شدید اعتراض

بڑا سوال یہ ہے کہ اگر مریم نواز چھٹی پر ہیں تو پھر آخر انہوں نے حکومت کے طیارے کا استعمال کیسے کیا؟ ان کی چھٹی اور اس طیارے کے اخراجات پاکستانی عوام ادا کر رہے ہیں؛ پی ٹی ائی رہنماء کا بیان

ساجد علی جمعرات 10 ستمبر 2026 15:56

مریم نواز کا دورہٴ لندن؛ نجی چھٹیوں پر سرکاری جہاز کے استعمال پر زلفی ..

لاہور (اُردو پوائنٹ اخبارتازہ ترین۔ 10 ستمبر 2026ء) پاکستان تحریک انصاف کے رہنماء زلفی بخاری نے وزیراعلیٰ پنجاب مریم نواز کے حالیہ دورہ لندن پر شدید تنقید کرتے ہوئے سرکاری طیارے کے استعمال اور عوامی فنڈز کے مبینہ ضیاع پر سنگین سوالات اٹھا دیئے۔ سماجی رابطے کی ویب سائٹ ایکس پر جاری اپنے ایک بیان میں زلفی بخاری نے کہا کہ اگر وزیراعلیٰ مریم نواز اپنے ذاتی اور خاندانی مصروفیت کے لیے چھٹی پر لندن گئی ہیں تو پھر وہ حکومت کا سرکاری جہاز کس قانون اور اخلاقی بنیاد پر استعمال کر رہی ہیں؟ اس وقت پاکستان کے عوام سخت معاشی مشکلات، تاریخی مہنگائی، اور شدید غربت سے نبرد آزما ہیں، جب کہ دوسری طرف ان کے ٹیکسوں کے پیسوں سے حکمرانوں کی ذاتی تعطیلات اور پرائیویٹ جیٹ کے بھاری اخراجات اٹھائے جا رہے ہیں۔

(جاری ہے)

The bigger question in this clip is: if she is on chhutti, then how the hell has she used the government’s private jet?
The people of Pakistan are paying for her holiday and the cost of that private jet. It’s unbelievable that this isn’t the main headline. Why isn’t everyone… pic.twitter.com/p4iCyOXOzT
— Sayed Z Bukhari (@sayedzbukhari) September 10, 2026

انہوں نے افسوس کا اظہار کرتے ہوئے کہا کہ یہ انتہائی حیران کن بات ہے کہ اتنا بڑا اور سنجیدہ معاملہ ملکی میڈیا پر مرکزی خبر نہیں بن پا رہا اور اس شاہ خرچی پر اپوزیشن یا عوام کی جانب سے وہ سوالات نہیں اٹھائے جا رہے جو اٹھائے جانے چاہئیں، کیوں کہ وزیراعلیٰ پنجاب نے مبینہ طور پر مکمل طور پر نجی اور شخصی دورے کے لیے سرکاری خزانے کا بے دریغ استعمال کیا ہے، جو کہ حکمرانوں کے تکبر اور عوام سے بے حسی کو ظاہر کرتا ہے۔

زلفی بخاری کا مزید کہنا تھا کہ ایک طرف غریب عوام روٹی اور بنیادی ضروریات زندگی کو ترستی ہے، جبکہ دوسری طرف حکمران طبقہ عوامی وسائل پر شاہانہ زندگی گزارنے کا عادی ہو چکا ہے، اس تمام تر صورتحال میں قوم کو اس قسم کے اقدامات پر حکمرانوں سے جواب طلبی کرنی چاہیے اور عوامی فنڈز کے اس بے جا اور ذاتی استعمال کو فوری طور پر روکا جانا چاہیئے۔