بتایا جائے کہ مریم نواز کے لندن اخراجات کے 6 کروڑ روپے کس اکاؤنٹ سے ادا کیے جائیں گے؟ فواد چوہدری

اسلام آباد (اردوپوائنٹ اخبارتازہ ترین- انٹرنیشنل پریس ایجنسی۔ 11 ستمبر 2026 ) قومی ڈائیلاگ کمیٹی کے رہنما فواد چوہدری نے کہا ہے کہ مریم نواز کا سرکاری جہازمیں لندن کا نجی دورہ سوا 6 کروڑ روپے کا پڑا، عظمیٰ بخاری سے خرچ کی رسید نہیں دی جائے گی اسلام آباد میں محمود مولوی کے ہمراہ پریس کانفرنس میں فواد چوہدری نے کہا کہ تیل کی قیمتوں میں 26 فروری سے اب تک 119 روپے کا اضافہ ہوچکا ہے.

انہوں نے کہا کہ حکومت11سو ارب بجلی پر لے چکی، کپیسٹی پیمنٹ 1800 ارب دے چکے ہیں، 6 کھرب روپے ٹیکس کے کپیسٹی پیمنٹ سمیت دیگر چیزوں میں دے رے ہیں فواد چوہدری نے کہا کہ ٹیکس کے پیسوں سے گاڑیوں سے بڑھ کر اب جہاز لیے جارہے ہیں، پنجاب میں وزیراعلیٰ اور سینئر وزیر کے الگ الگ جہاز لیے گئے ہیں. ان کا کہنا تھا کہ مریم نواز سرکاری جہاز میں لندن گئیں، نجی دورہ سوا 6 کروڑ روپے کا پڑا، عظمی بخاری کہتی ہیں مریم نے رقم اپنی جیب سے ادا کی قومی ڈائیلاگ کمیٹی کے رہنما نے یہ بھی کہا کہ میں نے عظمیٰ بخاری سے ادائیگی کی رسید مانگی، وہ بھی نہیں دی جائے گی، صدر مملکت، وزیر داخلہ بھی سرکاری جہازوں پر دوروں پر رہتے ہیں.

فواد چوہدری نے کہا کہ پانچ روز میں پٹرول کی قیمت میں 25 روپے ہوا ہے جبکہ پنجاب میں غربت کی شرح میں 41 فیصد اضافہ ہوا ہے۔

(جاری ہے)

انہوں نے کہا کہ مریم نواز کے لندن دورے پر تقریباً سوا چھ کروڑ روپے کے اخراجات کا دعویٰ کیا جا رہا ہے مریم نواز کے لندن دورے کے اخراجات ذاتی طور پر ادا کرنے کے دعوے کی رسید عوام کے سامنے لائی جائے، پنجاب میں غربت کی شرح میں 41 فیصد اضافہ ہوا ہے،پنجاب کی 23 فیصد سے زائد آبادی 8 ہزار روپے ماہانہ بھی کمانے کے قابل نہیں.

انہوں نے کہاکہ پاکستان میں فوڈ سکیورٹی کی صورتحال انتہائی تشویشناک ہے سیاسی، انتظامی اور مالی اختیارات کی نچلی سطح تک منتقلی کے بغیر پاکستان کی گورننس بہتر نہیں ہو سکتی، نئے صوبوں کا قیام ایک بنیادی انتظامی اصلاح ہے، اس پر سنجیدہ بحث اور عملی اقدامات کی ضرورت ہے شناخت برقرار رکھتے ہوئے نئے صوبوں کے قیام کا طریقہ کار طے کیا جا سکتا ہے، سیاسی، انتظامی اور مالیاتی ڈیولوشن کے بغیر پاکستان میں گورننس کا مسئلہ حل نہیں ہوگا.

فواد چوہدری نے کہا 26 جنوری سے اب تک پٹرول کی قیمت میں تقریباً 119 روپے اضافہ ہوا،حکومت صرف مشرقِ وسطیٰ کی صورتحال کو پٹرولیم قیمتوں میں اضافے کا جواز نہیں بنا سکتی، پٹرول کی قیمتوں میں اضافے کے اثرات پاکستان کی صنعت، زراعت اور ہر شعبے پر پڑ رہے ہیں، فروری سے اب تک بجلی کی قیمت میں 28 فیصد سے زائد اضافہ ہو چکا ہے،حکومت آئندہ تین ماہ میں بجلی کی قیمت میں مزید 10 فیصد اضافے کا اعلان کر چکی ہے،بجلی کے کمرشل یونٹ کی قیمت 140 روپے تک پہنچ جائے تو معیشت کیسے چلے گی؟ .

انہوں نے کہا کہ حکومت عوام پر ٹیکسوں کا بوجھ ڈال کر اپنی نااہلی کی قیمت عام آدمی سے وصول کر رہی ہے،پٹرولیم لیوی کی مد میں حکومت تقریباً 2 ہزار ارب روپے ٹیکس وصول کر رہی ہے بجلی اور گیس کے ذریعے بھی عوام سے اربوں روپے ٹیکس وصول کیا جا رہا ہے، 1800 ارب روپے کی کیپسٹی پیمنٹس کے باوجود پورے پاکستان میں لوڈشیڈنگ ہو رہی ہے،وفاقی حکومت چلانے کا خرچ 750 ارب روپے تک پہنچ گیا ہے.

سابق وفاقی وزیرنے کہاکہ حکومت کے غیر ضروری اخراجات اور ٹیکسوں کا بوجھ عوام پر منتقل کیا جا رہا ہے، فواد چوہدری نے کہاکہ حکومتی عیاشیوں کا بوجھ اٹھانے کی بجائے عام آدمی کو ریلیف دینا ہوگا،سرکاری وسائل کے بے دریغ استعمال نے پاکستان کی معیشت کو تباہی کے دہانے پر پہنچا دیا، حکمران نجی دوروں کے لیے بھی سرکاری وسائل اور جہاز استعمال کر رہے ہیں انہوں نے کہاکہ لوکل گورنمنٹ کو اختیارات اور وسائل منتقل کیے بغیر حقیقی ڈیولوشن ممکن نہیں نئے صوبوں کی بحث کو متنازع بنا کر طویل کرنے سے اصلاحات کا عمل متاثر ہوگا، نئے صوبوں کے قیام کی بحث کو عملی اقدامات کی طرف لے جانے کی ضرورت ہے۔