خانیوال کے رہائشی پاکستانی شہری کا امریکہ میں ویب سائٹ کے ذریعے تقریباً 35 ارب روپے کا فراڈ

33 سالہ فہیم اکرم نے جعلی ڈاک ٹکٹ سسٹم چلایا، جس سے امریکی پوسٹل سروس کو 126 ملین ڈالرز سے زائد کا نقصان اٹھانا پڑا، ملزم پر فردِ جرم عائد کردی گئی

ساجد علی جمعرات 1 اکتوبر 2026 13:07

خانیوال کے رہائشی پاکستانی شہری کا امریکہ میں ویب سائٹ کے ذریعے تقریباً ..

واشنگٹن (اُردو پوائنٹ اخبارتازہ ترین۔ 01 اکتوبر 2026ء) امریکی ریاست فلوریڈا کی جنوبی ضلعی وفاقی گرینڈ جیوری نے پاکستان کے ضلع خانیوال سے تعلق رکھنے والے 33 سالہ شہری پر امریکی پوسٹل سروس کو 126 ملین ڈالر تقریباً 35 ارب پاکستانی روپے سے زائد کا زبردست مالی نقصان پہنچانے کے الزام میں فردِ جرم عائد کردی۔

بحوالہ عدالتی دستاویزات بی بی سی کے مطابق ملزم ’لیبلزبینک ڈاٹ کام‘ نامی ایک ویب سائٹ چلا رہا تھا، جس کے ذریعے جعلی امریکی ڈاک لیبلز فروخت کیے جاتے تھے، استغاثہ نے انکشاف کیا ہے کہ اس ویب سائٹ کے ذریعے 50 لاکھ سے زائد جعلی شپنگ لیبلز محض 2 ڈالر فی لیبل کی معمولی قیمت پر فروخت کیے گئے، جن کا استعمال کرکے 5 ہزار 200 سے زائد صارفین نے پارسل کے اصل وزن اور منزل کے اخراجات سے بچتے ہوئے کروڑوں ڈالر کا فریب دیا۔

(جاری ہے)

دو ڈالر کا جعلی ٹکٹ، پوسٹل سروس کو 126 ملین ڈالر سے زائد کا نقصان: خانیوال کے رہائشی کے خلاف امریکہ میں فراڈ کا مقدمہ کیوں درج ہوا؟ https://t.co/h0dr1Q4cE4
— BBC News اردو (@BBCUrdu) October 1, 2026

امریکی اٹارنی جیسن اے ریڈنگ کوئینونیز اور امریکی پوسٹل انسپیکشن سروس میامی ڈویژن کے انچارج بلادیسمیر روخو نے بتایا کہ یہ سرحد پار دھوکہ دہی کا ایک انتہائی منظم اور بڑا نیٹ ورک تھا، امریکی عدالت نے فردِ جرم عائد کرتے ہوئے ویب سائٹ کی ڈومین کو فوراً ضبط اور بند کرنے کا حکم جاری کردیا ہے۔

بتایا گیا ہے کہ پاکستانی شہری پر امریکہ کے خلاف دھوکہ دہی کی سازش، جعلی ڈاک لیبل بنانے، فروخت کرنے اور الیکٹرانک ذرائع سے فراڈ کے سنگین الزامات عائد کیے گئے ہیں، جرم ثابت ہونے کی صورت میں ملزم کو وائر فراڈ کے ہر الزام پر 20، 20 سال جبکہ سازش کے الزامات پر 5 سال تک قید کی سخت سزا ہو سکتی ہے، تاہم فی الحال یہ واضح نہیں ہو سکا کہ ملزم امریکی پولیس کی حراست میں ہے یا پاکستان میں موجود ہے۔