محسن نقوی کی گورنر خیبرپختونخوا سے ملاقات، صوبے کو دہشتگردی سے بچانے کیلئے آئینی کردار ادا کرنے پر اتفاق

کے پی میں ہنگامی صورتحال سے نمٹنے کی حکمت عملی تیارہیں، آئی جی کی وفاقی وزیر داخلہ کو بریفنگ

اتوار 4 اکتوبر 2026 20:55

محسن نقوی کی گورنر خیبرپختونخوا سے ملاقات، صوبے کو دہشتگردی سے بچانے ..

پشاور(اُردو پوائنٹ اخبارتازہ ترین - این این آئی۔ 04 اکتوبر2026ء) وفاقی وزیر داخلہ محسن نقوی کی گورنر ہائوس پشاور میں گورنر خیبرپختونخوا فیصل کریم کنڈی سے اہم ملاقات ہوئی جس میں صوبے کو دہشت گردی سے بچانے کیلئے آئینی کردار ادا کرنے پر اتفاق کیا گیا۔اتوارکومحسن نقوی کی گورنر ہائوس پشاور میں گورنر خیبرپختونخوا سے ملاقات ہوئی، ملاقات میں چیف سیکرٹری اور آئی جی بھی موجود تھے۔

ملاقات میں صوبے میں امن و امان کی صورتحال اور پی ٹی آئی کے لانگ مارچ پر غور کیا گیا۔اعلامیے کے مطابق ملاقات میں گورنر اور وفاقی وزیرداخلہ کی صوبے کی سیاسی و سکیورٹی صورتحال پر گفتگو ہوئی۔گورنر و وزیرداخلہ نے صوبے کو دہشت گردی سے بچانے کے لیے آئینی کردار ادا کرنے پر اتفاق کیا۔اعلامیے کے مطابق ملاقات میں اتفاق ہوا کہ صدر اور وزیراعظم گورنر راج یا ایمرجنسی ضروری سمجھیں تو گورنر ہائوس آئینی کردار ادا کریگا۔

(جاری ہے)

اعلامیے میں کیا گیا کہ پی ٹی آئی کے لانگ مارچ میں سرکاری ہیلی کاپٹر اور وسائل کا استعمال عدالتی فیصلوں کی خلاف ورزی ہوگی۔ذرائع کے مطابق آئی جی خیبرپختونخوا نے وفاقی وزیرداخلہ کو صوبے کی صورتحال پر بریفنگ دی۔ذرائع کے مطابق آئی جی خیبرپختونخوا نے کہا کہ خیبر پختونخوا میں غیریقینی صورتحال پر پولیس الرٹ ہے، مختلف اضلاع سے پولیس اہلکار پولیس لائنزطلب کرلیے گئے ہیں، ہنگامی صورتحال سے نمٹنیکی حکمت عملی تیار کرلی گئی ہے۔