امریکہ، والدین کی نعشوں کے پاس بچے فلم دیکھنے میں مصروف!خاندانی المیے کا انتہائی المناک واقعہ

پیر 9 جنوری 2017 14:32

نیویارک (اُردو پوائنٹ اخبارآن لائن۔9جنوری۔2017ء)امریکی ریاست فلوریڈا میں حکام نے ایک خاندان کے افسوسناک المیے کی خبر دی ہے اور بتایا ہے کہ حال ہی میں دو میاں بیوی زہریلی منشیات استعمال کرنے سے دم توڑ گئے جب کہ ان کے تین کم سن بچے والدین کی موت سے بے خبر کار میں بیٹھے فلم دیکھتے رہے۔غیر ملکی خبر رساں ادارے کے مطابق پولیس نے ریاست فلوریڈا میں سڑک کے کنارے کھڑی ایک کار دیکھی۔

پولیس حکام کار کے قریب پہنچے تو وہاں پر 32 سالہ ڈینیل کلسی اور اس کی اہلیہ 30 سالہ ہیتھر کلسی کو نیم مردہ حالت میں پایا۔ دونوں کار کے باہر پڑے ہوئے تھے جب کہ ان کی کار کی عقبی نشست پر ان کے تین کم سن بچے بیٹھے فلم دیکھ رہے تھے۔ پولیس کا کہنا ہے کہ گذشتہ ہفتے کے روز یہ واقعہ مقامی وقت کے مطابق دن دو بجے پیش آیا۔

(جاری ہے)

تینوں بچوں کو ان کے والدین سیٹ بیلٹ کے ساتھ باندھ کر باہر اترآئے تھے جہاں انہوں نے زہریلی شراب پی۔

امدادی کارکن جب ان تک پہنچے تو وہ دم توڑ چکے تھے۔ اس دوران کار میں موجود تین کم سن بچے والدین کے انجام سے بے پرواہ ہو کر فلم دیکھنے میں مگن رہے۔ایک پولیس اہلکار نے بتایا کہ ابتدائی طور پر دونوں افراد کی موت کی وجہ زہریلی منشیات ہی بتائی جاتی ہیں۔ فوت ہونے والا جوڑا ماضی میں بھی منشیات کا عادی رہ چکا ہے۔ تینوں بچوں کو ان کے اقارب کے حوالے کر دیا گیا ہے۔ ان میں سے بڑے بیٹے کی عمر صرف چار سال جب کہ سب سے چھوٹے کی عمر آٹھ ماہ بتائی جاتی ہے۔