ایران کے ساتھ مصالحت کے لیے ثالثی کی درخواست نہیں کی،سعودیہ

ایرانی نظام کے ساتھ کسی بھی صورت میں قریب آنے کو مسترد کرتے ہیں،سعودی حکام

جمعرات 17 اگست 2017 13:34

ریاض(اُردو پوائنٹ اخبار آن لائن۔ جمعہ 18 اگست 2017ء)سعودی عرب نے ایران کے ساتھ کسی بھی مصالحتی ثالث کا کوئی مطالبہ نہیں کیا اور اس حوالے سے زیر گردش خبریں مکمل طور پر بے بنیاد ہیں۔ سعودی خبر رساں ایجنسی کے مطابق یہ وضاحت ایک سعودی ذمے دار ذریعے کی جانب سے سامنے آئی ہے۔ذریعے نے باور کرایا کہ مملکت اپنے موقف پر ثابت قدمی سے ڈٹی ہوئی ہے کہ وہ ایرانی نظام کے ساتھ کسی بھی صورت میں قریب آنے کو مسترد کرتی ہے ، وہ نظام جو خطے اور دنیا بھر میں دہشت گردی اور انتہا پسندی پھیلا رہا ہے اور دیگر ممالک کے معاملات میں دخل اندازی کرتا ہے۔

مملکت کے نزدیک حالیہ ایرانی نظام کے ساتھ مذاکرات ممکن نہیں کیوں کہ تجربے سے یہ بات ثابت ہو چکی ہے کہ یہ نظام سفارتی قواعد اور آداب اور بین الاقوامی تعلقات کے بنیادی اصولوں کا احترام نہیں کرتا اور یہ نظام حقائق کو مسخ کر کے پیش کرتا ہے۔

(جاری ہے)

مملکت ایرانی نظام کے خطرے اور بین الاقوامی امن و استحکام کے حوالے سے اس کے دشمنانہ اقدامات کو باور کراتی ہے۔ سعودی عرب پوری دنیا کے ممالک پر زور دیتا ہے کہ ایرانی نظام کو اس کے معاندانہ رجحان سے روکنے اور اس کو بین الاقوامی قوانین ، اقوام متحدہ کی قرار دادوں اور سفارتی آداب کا پابند بنانے کے لیے کام کریں۔