قطر کی طرف سے متحدہ عرب امارات کے مسافر طیارے کو روکنے کی کوشش کی گئی، بحرین

منگل 16 جنوری 2018 11:11

منامہ ۔ (اُردو پوائنٹ اخبار آن لائن۔ منگل 16 جنوری 2018ء) بحرین کے محکمہ شہری ہوا بازی نے کہا ہے کہ قطر کی طرف سے متحدہ عرب امارات کے مسافر طیارے کو روکنے کی کوشش کی گئی۔ بحرین کے ذرائع ابلاغ کے مطابق یہ واقعہ گزشتہ روز اس وقت پیش آیا جب قطر کے دو لڑاکا طیاروں نے اپنی فضائی حدود سے آکر امارات ایئر لائن کے دبئی سے آنے والے مسافر طیارے کو روکنے کی کوشش کی جب وہ بحرین انٹر نیشنل ایئرپورٹ سے روانہ ہوا۔

(جاری ہے)

قطر کے لڑاکا طیارے اماراتی مسافر طیارے سے دو میل کی دوری پر پرواز کرنے لگے جس کے باعث اماراتی طیارے کے مسافروں کی سلامتی کو خطرہ لاحق ہوگیا۔ دوسری جانب بحرینی حکام نے کہا ہے کہ مسافروں کی سلامتی کو یقینی بنانے کے لئے ہر ممکن اقدامات اٹھائے جائیں گے۔ انھوں نے کہا کہ بحرین کی حکومت قطر کے اس اقدام پر متعلقہ عالمی اداروں کو آگاہ کرے گی۔ واضح رہے کہ ا سے قبل بھی امارات کے الاتحاد ایئرلائن کے طیارے کے ساتھ اس طرح کا واقعہ پیش آچکا ہے۔