مونٹی نیگرو میں امریکی سفارتخانے پر خود کش حملہ ، حملہ آور کے علاوہ کوئی جانی نقصان نہیں ہوا

حملہ آور نے سفارت خانے کے اندرونی صحن میں پہلے دستی بم پھینکا اور پھر قریبی گلی میں جا کر خود کو بارودی مواد سے اڑا لیا تاہم سفارتخانے میں موجود تمام افراد محفوظ رہے، پولیس حکام

جمعرات 22 فروری 2018 20:50

مونٹی نیگرو(اُردو پوائنٹ اخبار آن لائن۔ جمعرات 22 فروری 2018ء)نیٹو کی رکن ریاست مونٹی نیگرو میں امریکی سفارت خانے پر خودکش حملہ ہوا تاہم کوئی جانی نقصان نہیں ہوا۔غیرملکی خبررساں ادارے کے مطابق یورپی ریاست مونٹی نیگرو کے دارالحکومت پوڈ گوریکا میں امریکی سفارتخانے پر خودکش حملہ کیا گیا ہے تاہم حملہ آور کے علاوہ کسی جانی نقصان کی اطلاعات نہیں۔

امریکی وزارت خارجہ نے حملے کی تصدیق کرتے ہوئے بیان جاری کیا ہے کہ مونٹی نیگرو میں واقع امریکی سفارت خانے کی عمارت کے اندرونی کمپاؤنڈ میں ایک چھوٹا دھماکا ہوا ہے اور اس حوالے سے مقامی پولیس کو امریکی سفارتخانے کی جانب سے ہر قسم کا تعاون فراہم کیا جا رہا ہے۔ جب کہ مونٹی نیگرو میں مقیم تمام امریکی باشندوں کو احتیاط برتنے کی تلقین اور بلاضرورت سفر کرنے سے منع کیا گیا ہے۔

(جاری ہے)

پوڈ گوریکا پولیس حکام نے حملے کو خودکش قرار دیتے ہوئے کہا ہے کہ گزشتہ رات حملہ آور نے سفارت خانے کے اندرونی صحن میں پہلے دستی بم پھینکا اور پھر قریبی گلی میں جا کر خود کو بارودی مواد سے اڑا لیا تاہم سفارتخانے میں موجود تمام افراد محفوظ رہے۔پوڈ گریکا پولیس نے حملے کے بعد عمارت کو گھیرے میں لے لیا اور جائے حادثہ سے شواہد اکٹھے کرکے بارودی مواد کے ٹکڑوں کو فرانزک ٹیسٹ کے لئے بھیج دیا گیا ہے اور سفارتخانے کے اہلکاروں کو ایک روز کے لئے ہرقسم کی سرگرمی سے روک دیا ہے۔