Arvi - Qudrati Tor Par Wazan Kam Karne Wali Sabzi - Article No. 2745

نسرین شاہین
اروی ایک مقبول جڑ والی سبزی ہے،جو آلو کی طرح زمین کے اندر پیدا ہوتی ہے۔موسمِ برسات کی یہ سبزی سیاہ،سرخ اور سفید اقسام میں دستیاب ہے،لیکن محض بیرونی چھلکے کا رنگ مختلف ہوتا ہے،اندر سے تمام اقسام کا رنگ سفید ہی ہوتا ہے۔اروی کی ایک قسم جنگلی بھی ہے،لیکن یہ بہت مشکل سے گلتی ہے،اس لئے اسے کھانے میں استعمال نہیں کیا جاتا ہے۔موسم گرما کی اس مشہور ترکاری کے پتے چوڑے،صاف اور چکنے ہوتے ہیں،جن میں غذائیت پائی جاتی ہے۔ان پتوں کو مختلف طریقوں سے پکایا جاتا ہے،لیکن ان کی تیزی اور شوریت کی وجہ سے زبان اور منہ کا اندرونی حصہ کٹتا ہوا محسوس ہوتا ہے۔چونکہ اروی کے پتوں کی خصوصیت چبھنے والی ہوتی ہے،لہٰذا اسے املی کے ساتھ اُبالنا چاہیے،تاکہ اس کی تیز بو ختم ہو جائے۔

(جاری ہے)

اُبلی ہوئی اروی کے سلائس کاٹ کر ان کے ذائقہ دار چپس بھی بنائے جا سکتے ہیں۔اروی کے پتوں سے لذیذ کباب بنائے جاتے ہیں،تو انہیں پالک کے پتوں کی طرح بیسن میں شامل کر کے پکوڑے بھی بنا سکتے ہیں۔اس کے علاوہ اروی کو گوشت اور پالک کے ساتھ بھی پکایا جا سکتا ہے۔اروی پکاتے ہوئے گرم مصالحہ ضرور استعمال کریں۔
اروی میں کئی مفید غذائی اجزاء پائے جاتے ہیں۔اس کا مزاج اور اس کی تاثیر سرد تر اور دیر سے ہضم ہوتی ہے۔فربہی مائل افراد کے لئے اروی کا استعمال اس لئے مفید ثابت ہوتا ہے کہ ان کے وزن میں نمایاں کمی واقع ہو جاتی ہے،کیونکہ نشاستہ اور ریشہ پوری طرح ہضم نہیں ہو پاتا ہے،اس لئے وزن بڑھ نہیں پاتا ہے۔اروی نظام ہضم کو تقویت پہنچاتی ہے۔اس کے استعمال سے انتڑیوں میں موجود مفید بیکٹیریا کی افزائش بڑھ جاتی ہے۔گٹھیا،قبض اور ریاح کے مریضوں کو اس کے استعمال سے پرہیز کرنا چاہیے۔البتہ ہائی بلڈ پریشر،مثانے کے امراض،خونی بواسیر اور خون کی کمی کے شکار مریضوں کے لئے فائدہ مند ہے۔اروی جلدی امراض میں بھی شفا کا باعث بنتی ہے اور جلد کی خشکی اور شکنیں دُور کرتی ہے۔کسی جلدی مرض یا خون میں خرابی پیدا ہو جانے کے سبب بعض اوقات زیرِ جلد گلٹیاں اور گانٹھیں بن جاتی ہیں۔ان گلٹیوں کو گھلانے کے لئے اروی مفید ہے۔اس کے لئے سیاہ اروی کے پتے اور ڈنڈیوں کا رس نکال کر اس میں تھوڑا سا نمک شامل کر کے گلٹیوں والی جگہ پر لیپ کریں۔جلد ہی گلٹیاں گھل جائیں گی۔جذام،خارش، اور داد جیسے جلدی امراض میں اروی کو اندرونی اور بیرونی طور پر استعمال کیا جا سکتا ہے۔اگر کسی زخم سے خون رس رہا ہو،تو اروی کے پتوں کا رس نکال کر پینے اور متاثرہ جگہ پر لیپ کرنے سے فوری افاقہ ہوتا ہے۔اروی میں موجود اینٹی آکسیڈنٹس بیشتر امراض کے خلاف مدافعت پیدا کرتے ہیں۔