Mausam Hai To Sarson Ka Saag Zaroor Khaain - Article No. 2818

برصغیر پاک و ہند میں رہنے والے سرسوں کے ساگ سے بخوبی واقف ہیں‘یہ سبز پتے صدیوں سے کھانے کیلئے استعمال کئے جا رہے ہیں‘اس کے ساتھ ساتھ انہیں مختلف مقاصد کیلئے بھی استعمال کیا جاتا ہے۔
جراثیم کش ہونے کی وجہ سے سرسوں کے ساگ کو زخموں کیلئے مفید سمجھا جاتا ہے جبکہ یہ بھی مانا جاتا ہے کہ اس کے کھانے سے گردوں کے افعال بہتر ہوتے ہیں۔کچھ افراد خون کی صفائی کیلئے سرسوں کا ساگ کھاتے ہیں تو کچھ کھانسی یا گلے کی خراش کا علاج اس میں ڈھونڈتے ہیں۔
جدید تحقیق میں بھی سرسوں کے ساگ کے فوائد کو ثابت کیا گیا ہے اور یہ معلوم ہوا ہے کہ اس میں پالک سے زیادہ وٹامن A جبکہ مالٹے سے زیادہ وٹامن C ہوتا ہے۔
تحقیقی رپورٹس میں اس کے روایتی استعمال کے تمام فوائد کی جانچ پڑتال تو نہیں کی گئی مگر صحت کیلئے اس کے متعدد فوائد ضرور ثابت کئے ہیں۔

(جاری ہے)

سرسوں کے ساگ میں صحت کیلئے مفید متعدد اینٹی آکسائیڈنٹس جیسے بیٹاکیروٹین موجود ہوتے ہیں جو جلد کا تحفظ کرنے کے ساتھ ساتھ ذیابیطس سے متاثر ہونے کا خطرہ کم کرتے ہیں۔
اس میں وٹامن B1‘وٹامن B3‘وٹامن B6‘وٹامن K‘وٹامن C‘وٹامن A‘کیلشیم‘پوٹاشیم‘پروٹین‘کاربوہائیڈریٹس‘آئرن‘زنک‘ فاسفورس اور فائبر جیسے غذائی اجزاء ہوتے ہیں۔سرسوں کے ساگ میں موجود طاقتور اینٹی آکسائیڈنٹس سے خلیات کو جسم میں گردش کرنے والے مضر صحت مالیکیولز سے ہونے والے نقصان سے تحفظ ملتا ہے۔خلیات کو نقصان پہنچنے سے جوڑوں کے امراض،امراضِ قلب اور دماغی تنزلی کا خطرہ بڑھتا ہے۔تحقیقی رپورٹس سے یہ بھی ثابت ہوا ہے کہ اینٹی آکسائیڈنٹس سے مدافعتی نظام مضبوط ہوتا ہے اور متعدد دائمی امراض کا خطرہ کم ہوتا ہے۔
اینٹی آکسائیڈنٹس کے ساتھ ساتھ سرسوں کے ساگ میں وٹامن C کی مقدار بھی کافی زیادہ ہوتی ہے۔یہ وٹامن مضبوط مدافعتی نظام کیلئے ضروری ہوتا ہے اور جسم میں اس کی کمی سے اکثر بیمار رہنے کا خطرہ بڑھتا ہے۔اسی طرح وٹامن A بھی امراض کے خلاف مدافعتی ردعمل میں معاونت فراہم کرتا ہے۔
تحقیقی رپورٹس سے ثابت ہوا ہے کہ سبز پتوں والی سبزیاں جیسے سرسوں کے ساگ کو اکثر کھانے سے امراضِ قلب سے متاثر ہونے کا خطرہ نمایاں حد تک کم ہوتا ہے۔ان سبزیوں میں ایسے اجزاء موجود ہوتے ہیں جو جسم میں کولیسٹرول کی سطح کم کرتے ہیں اور شریانوں میں چربیلا مواد جمع نہیں ہوتا‘جس سے امراضِ قلب اور فالج کا خطرہ بڑھتا ہے۔
سرسوں کے ساگ میں موجود وٹامن K خون کے جمنے کا خطرہ کم کرنے میں مدد فراہم کرتا ہے اور ہڈیوں کو مضبوط بناتا ہے۔تحقیقی رپورٹس سے ثابت ہوا ہے کہ غذا کے ذریعے مناسب مقدار میں وٹامن K کے حصول سے ہڈیاں مضبوط ہوتی ہیں اور فریکچر سے تحفظ ملتا ہے۔
سرسوں کے ساگ میں لیوٹین ہوتا ہے جو آنکھوں کو صحت مند رکھنے کیلئے ضروری ہوتے ہیں اور عمر بڑھنے سے بینائی میں آنے والی کمزوری سے تحفظ ملتا ہے۔تحقیقی رپورٹس کے مطابق لیوٹین سے دماغی ٹشوز کو فائدہ ہوتا ہے۔اس سے دماغی کارکردگی بہتر ہوتی ہے جبکہ دماغی تنزلی کا خطرہ کم ہوتا ہے۔