Chocolate Bhi Khaye Wazan Bhi Na Barhain - Article No. 2764

کھانے‘پینے کا شوقین کون سا ایسا فرد ہو گا جسے چاکلیٹس پسند نہ ہوں۔منہ میں پانی بھر لانے والا یہ مزیدار میٹھا دنیا بھر میں سب سے زیادہ پسند کیا جاتا ہے۔
چاکلیٹ سے تیار کردہ اشیاء جیسے چاکلیٹ کینڈی‘چاکلیٹ کیک‘چاکلیٹ ڈرنکس‘چاکلیٹ آئسکریم‘چاکلیٹ کوکیز و بریڈ سمیت بے شمار اقسام کی سویٹ ڈشز ایسی ہیں جنہیں دنیا بھر میں پسندیدگی کے اولین درجہ پر فائز کیا جاتا ہے‘لیکن ان تمام مزیدار خوبیوں کے ساتھ چاکلیٹ کھانے میں محض ایک قباحت یہ ہے کہ چاکلیٹ کی ایک درمیانی اسٹک یا بار (Bar) جسم میں کیلوریز کا بے تحاشہ اضافہ کر دیتی ہے۔
جبکہ تحقیق کاروں کے مطابق چاکلیٹ میں پائی جانے والی کیلوریز کچھ اس انداز کی ہوتی ہیں جو جسم میں داخل ہو کر چربی کی صورت میں تیزی سے سرین اور رانوں پر جمنے لگتی ہے یا پھر چہرے کے پٹھوں کے گرد جم کر آپ کو فربہی مائل ظاہر کر سکتی ہیں۔

(جاری ہے)

ایک اوسط سائز کی چاکلیٹ بار میں کیلوریز کی مقدار 200 تک ہوتی ہے،لیکن چاکلیٹ پسند کرنے والے افراد اس طرف دھیان نہیں دیتے اور اپنے وزن میں اضافہ کئے چلے جاتے ہیں اور ہوش تب آتا ہے جب کوئی اُن کے بے ڈول سراپے پر تنقیدی جملے کستا ہے یا پھر موٹاپے کے باعث انہیں مختلف بیماریاں گھیرنے لگتی ہیں۔

اس لئے چاکلیٹ کے شوقین اس بات کو ذہن نشین کر کے اُس پر سختی سے کاربند رہنے کی کوشش کریں کہ اگر وہ ایک عدد اوسط سائز کی چاکلیٹ بار سے لطف اندوز ہو رہے ہیں تو اس کے بعد 33 منٹ تک ایروبک ورزش کرنے یا 40 منٹ تک تیز قدموں سے واک کرنے کو اپنے اوپر لازم کر لیں تاکہ اُن کی من پسند چاکلیٹس اُنہیں کسی اذیت ناک مرض میں مبتلا نہ کر سکیں۔