پو لیو مہم کے کامیاب انعقاد کیلئے ڈپٹی کمشنر ۱ٓفس میں کنٹرول روم قائم کردیا گیا، فون نمبرز بھی جاری

فیصل آباد (اُردو پوائنٹ اخبارتازہ ترین - اے پی پی۔ 15 جنوری2019ء) پیر 21جنوری سے شروع ہونیوالی تین روزہ قومی انسداد پولیو مہم کے کامیاب انعقاد اور پولیو ٹیموں کی مانیٹرنگ کیلئے ڈپٹی کمشنر ۱ٓفس میں کنٹرول روم قائم کردیا گیا ہے اور اس کے فون نمبرز بھی جاری کر دئیے گئے ہیں جبکہ عوام سے اپیل کی گئی ہے کہ اگر کسی جگہ پولیو ٹیم نہ پہنچے تو فون نمبر 041-9201491 اور 041-9201492 پر فوری اطلاع کی جائے تاکہ ٹیم کو روانہ کیا جا سکے نیز تمام سٹیک ہولڈرز سے کہا گیا ہے کہ ضلع میں انسداد پولیو مہم کو کامیاب بنانے کیلئے والدین کی آگہی کے سلسلے میں مئوثر مہم جاری رہنی چاہئے تاکہ کسی بھی گھر کا پانچ سال تک کی عمر کا کوئی بچہ حفاظتی قطروں کے بغیر نہ رہے۔

ڈپٹی کمشنر سردار سیف اللہ ڈوگر نے کہا کہ ضلع میں 21 سے 23 جنوری تک انسداد پولیو کے آئندہ رائونڈ کے دوران پانچ سال تک کی عمر کے بچوں کو پولیو ویکسین کے قطرے پلانے کے سو فیصد اہداف میں کوئی کسر اٹھا نہ رکھی جائے اور کسی وجہ سے رہ جانے والے بچوں کو حفاظتی قطرے پلانے تک چین سے نہ بیٹھیں۔

(جاری ہے)

انہوں نے کہا کہ انسداد پولیو مہم کو بار بار دہرانے کا مقصد اس مرض کے وائرس کا یکسر خاتمہ کرنا ہے جس کیلئے متعلقہ محکموں کی ذمہ داریاں انتہائی اہمیت کی حامل ہیں لہذا ضلع بھر میں پانچ سال تک کی عمر کا ایک بھی بچہ پولیو ویکسین کے قطروں سے محروم نہیں رہنا چاہئے ۔

اس سلسلے میں بچے کے ملنے تک بار بار گھر کے چکر لگائے جائیں۔انہوں نے کہا کہ پولیو مہم کی کڑی مانیٹرنگ ہو گی اور اگر کسی جگہ غفلت پائی گئی تو سخت کارروائی سے گریز نہیں کیا جائے گا ۔ ڈی سی نے ہسپتالوں ‘ پارکوں ‘ ریلوے اسٹیشنز‘ایئر پورٹ ‘ موٹر وے انٹر چینجز اور دیگر عوامی مقامات پر پولیو ٹیموں کو متحرک رکھنے کی تاکید کی اور والدین سے اپیل کی کہ وہ اپنے پانچ سال تک کی عمر کے بچوں کو پولیو سے بچائو کے قطرے ضرور پلوائیں خواہ اس سے قبل کتنی بار بھی بچوں نے قطرے پی رکھے ہوں۔

انہوں نے کہا کہ مہم کے دوران ڈی سی آفس میں کنٹرول روم فنکشنل رہے گا لہٰذ ا اگر کسی جگہ پولیو ٹیم نہ پہنچے تو فون نمبر 041-9201491 اور 041-9201492 پر فوری اطلاع کریں تاکہ ٹیم کو روانہ کیا جا سکے ۔ سی ای او ڈاکٹر مشتاق سپرا نے بتایا کہ مہم کے دوران ضلع میں پانچ سال تک کی عمر کے تقریبا 13 لاکھ سے زائد بچوں کو حفاظتی قطرے پلائے جائیں گے جس کیلئے محکمہ صحت کی تین ہزار سے زائد ٹیمیں متحرک ہونگی ۔انہوں نے بتایا کہ 24 اور 25 جنوری بروز جمعرات و جمعہ دو اضافی دن بھی کسی وجہ سے رہ جانے والے بچوں کو حفاظتی قطرے پلانے کیلئے پولیو ٹیمیں ڈیوٹی پر موجود ہوگی ۔