سرکاری اسپتالوں کی ترقی اور شہریوں کو بہتر طبی سہولتوں کی فراہمی کے لئے پرائیویٹ سیکٹر کی شمولیت بھی بہت ضروری ہے،میٹروپولیٹن کمشنر کراچی

کراچی (اُردو پوائنٹ اخبارتازہ ترین - این این آئی۔ 08 مارچ2019ء) میٹروپولیٹن کمشنر ڈاکٹر سید سیف الرحمن نے کہا ہے کہ سرکاری اسپتالوںکی ترقی اور شہریوں کو بہتر طبی سہولتوں کی فراہمی کے لئے پرائیویٹ سیکٹر کی شمولیت بھی بہت ضروری ہے تاکہ ادارے اپنے پیروں پر کھڑے ہوسکیں، عباسی شہید اسپتال کے مختلف شعبہ جات کے لئے جو بھی ضروری طبی آلات اور مشینیں درکار ہیں ان کی مکمل فہرست علیحدہ علیحدہ ہر شعبہ کی سطح پر بنائی جائے تاکہ اسے پورا کیا جاسکے، کسی بھی کام کو کامیابی کے ساتھ پائیہ تکمیل تک پہنچانے کے لئے جہاں اس کے متعلق ضروری سامان یا ٹولز درکار ہوتے ہیں وہیں اس سے زیادہ بہتر انتظام اور انصرام ، عزم اور جذبہ کی ضرورت ہوتی ہے ، ہم میں سے جو بھی اپنے شعبہ کا ذمہ دار ہے اسے چاہئے کہ وہ صرف اپنے شعبہ اور کام پر مکمل توجہ دے اس طرح یقینا وہ شعبہ اپنی کارکردگی میں بہتر سے بہتر ہوتا جائے گا جس کے ثمرات عوام تک پہنچیں گے، ان خیالات کااظہار انہوں نے جمعہ کی صبح عباسی شہید اسپتال کا دورہ کرنے کے موقع پر گفتگو کرتے ہوئے کیا، اس موقع پر سینئر ڈائریکٹر میڈیکل اینڈ ہیلتھ سروسز ڈاکٹر بیربل گینانی، میڈیکل سپرنٹنڈنٹ ڈاکٹر ندیم راجپوت، ڈاکٹر عامر جلیل، ڈاکٹر امجد گلزار، ڈاکٹر محمود حیدر، ڈاکٹر شاہد نور اور دیگر بھی موجود تھے، ڈاکٹر سید سیف الرحمن نے چند روز قبل اسپتال کے شعبہ آرتھو پیڈک میں نصب کی گئی دوران آپریشن اسکرین پر جائزہ لینے والی جدید ترین مشین امیج انٹینسی فائر(C Aram)Image Intensifier کا بھی معائنہ کیا، انہوں نے ہدایت کی کہ سی آرم مشین سمیت دیگر جدید مشینوں کو بھی آپریٹ کرنے کے لئے مستند اور تربیت یافتہ اسٹاف استعمال کیا جائے،انہوں نے کہا کہ عباسی شہید اسپتال کے سرجری سے متعلق تینوں شعبہ جات آرتھوپیڈک، نیورو او رڈینٹل کو فعال بنانے کے لئے ضروری ہے کہ مذکورہ شعبہ جات میں تمام تر طبی آلات اور جدید مشینیں نہ صرف یہ کہ موجود ہوں بلکہ انہیں استعمال کرنے کے لئے باقاعدہ تربیت یافتہ اسٹاف بھی موجود ہو، کئی ادارے اور افراد صرف اور صرف انسانیت کی بھلائی کی خاطر ہمارا ہاتھ بٹانے کے لئے تیار ہیں ضرورت اس بات کی ہے کہ انہیں ہمارا کام دیکھ کر یہ یقین ہو کہ ان کاپیسہ اورعطیہ کیا گیا سامان صحیح جگہ استعمال ہوگا، انہوں نے کہا کہ جن اداروں یا شخصیات کی جانب سے جو سامان یا طبی آلات اسپتال کو عطیہ کئے جاتے ہیں ان کاباقاعدہ اندراج کیا جائے، انہوں نے ہدایت کی کہ اسپتال کے وہ واش رومز جو نمی اور رسائو کا شکار ہیں ان کی درستگی کے کاموں کو تیز کیا جائے اور انہیں اس طرح بنایا جائے کہ وہ دوبارہ رسائو کا شکار نہ ہوں۔