ہیلتھ کیئر کمیشن کی جانب سے سندھ بھر کے سرکاری و نجی اسپتالوں کو رجسٹرڈ کرنے کا سلسلہ تیز گیا گیا

گھوٹکی(اُردو پوائنٹ اخبارتازہ ترین - این این آئی۔ 09 اپریل2019ء) حکومت سندھ کا قائم کردہ سندھ ہیلتھ کیئر کمیشن " معیاری نگہداشت سب کے لئی" کے عزم پر ایکٹ پر مکمل عمل درآمد کروانے کے لئے کوشاں ، سندھ بھر کے سرکاری و نجی اسپتالوں کو رجسٹرڈ کرنے کا سلسلہ تیز گیا گیا ۔اس سلسلے میں سندھ ہیلتھ کیئر کمیشن کی جانب سے میرپور ماتھیلو میں ایک روزہ آگہی سیمینار منقعد کیا گیا ۔

جس میں خطاب کرتے ہوئے ڈپٹی کمشنر گھوٹکی سلیم اللہ اوڈو نے کہا کہ سندھ ہیلتھ کیئر کمیشن بہترین اقدامات کر رہی ہے جس سے ایک امید کی کرن پیدا ہوئی ہے کہ تمام جلد سندھ کی اسپتالوں کی حالت بہتر ہوجائے گی اور لوگوں کو صحت کی معیاری سہولتیں فراہم ہوں گی ۔ انہوں نے کہا کہ ضلعی انتظامیہ اوور سائیٹ کمیٹی کے تحت ضلع بھر کی اسپتالوں کو بہتر بنانے کے لئے کوشاں ہے۔

(جاری ہے)

انہوں نے میڈیکل افسران کو ہدایت کی کہ اسپتالوں میں آنے والے مریضوں کے ساتھ بہتر سلوک اختیار کیا جائے اس سلسے میں کسی قسم کی غفلت برداشت نہیں کریں گے۔ قبل ازیں کمیشن کے ڈائریکٹر کلینکل اینڈ ٹرینگس ڈاکٹر احمد رضا کاظمی نے کہا کہ کمیشن کا بنیادی مقصد صوبے بھر کے لوگوں کو سرکاری و نجی اسپتالوں میں ملنے والی صحت کی سہولتوں کو قانون کے مطابق معیاری بنانا ہے جس پر ہر قیمت پر عمل درآمد کروایا جائے گا اور ایکٹ کی خلاف ورزی کرنے والی اسپتالوں کے خلاف کارروائی کی جائے گی ۔

انہوں نے کہا کہ سندھ بھر کے تمام اسپتالوں کو رجسٹرڈ کرکے سندھ ہیلتھ کیئر کمیشن کے دائرہ میں لاکر منیمم سروسز ڈلیوری اسٹینڈرڈ (MSDS) پر عمل درآمد کا پابند بنایا جائے گا جبکہ کمیشن سے رجسٹریشن حاصل نہ کرنے والے اسپتالوں کے خلاف قانونی کارروائی کریں گے ۔اس موقع پر ڈائریکٹر لائسننگ اینڈ ایکریڈٹیشن ڈاکٹر فرحانہ میمن نے بتایا کہ سندھ بھر میں لوگوں کو صحت کی معیاری سہولتیں فراہم نہ کرنے والی سرکاری و نجی اسپتالوں کے خلاف شکایات پر 3 ماہ میں فیصلہ کرنے کے پابند ہیں ۔

انہوں نے بتایا کہ کمیشن نے اس وقت تک 120 اسپتالوں کے خلاف کارروائی کی ہے ۔ ڈاکٹر فرحانہ میمن نے مزید کہا کہ سندھ ہیلتھ کیئر کمیشن محکمہ صحت میں انقلابی اقدامات کر رہی ہے کیوںکہ عوام کو صحت کی معیاری سہولتیں فراہم کرنا کمیشن کا مشن ہے جس پر عمل درآمد کروانے کے لئے قانونسازی کی گئی ہے ۔ سیمینار میں ڈی ایچ او گھوٹکی ڈاکٹر الطاف سومرو، ایم ایسز اور سرکاری و نجی اسپتالوں کے ڈاکٹروں نے بڑی تعداد میں شرکت کی۔