کراچی ، ہیٹ ویو کے اثرات کو کم کرنے کیلئے پودوں اور درختوں کی شکل میں بڑے پیمانے پر سبزے کی انتہائی ضرورت ہے، ماہرین طب

کراچی(اُردو پوائنٹ اخبارتازہ ترین - این این آئی۔ 27 اپریل2019ء) ماہرین طب نے کہا ہے کہ ہیٹ ویو کے اثرات کو کم کرنے کے لیے شہر میں پودوں اور درختوں کی شکل میں بڑے پیمانے پر سبزے کی انتہائی ضرورت ہے، شہر سبزے کے بجائے کنکریٹ کے جنگل میں تبدیل ہوتا جارہا ہے جس کی وجہ سے گرمیوں میں شہریوں کی جان کو خطرات لاحق ہورہے ہیں۔جناح ہسپتال شعبہ ایمرجنسی کی سربراہ ڈاکٹر سیمی جمالی نے بتایا کہ خصوصا دن 11 بجے سے شام 4 بجے کے دورانیے میں سخت دھوپ کی حالت میں گھروں سے باہر نکلنے سے گریز کریں، اگر ضروری کام سے نکلنا ہو تو سر پر گیلا تولیہ رکھ دیں، گرمی میں ہلکے کپڑوں کا استعمال کریں، جسم کو گیلا رکھیں اور حتی الامکان نہانے پر توجہ مرکوز رکھیں۔

انہوںنے کہاکہ عموما یہ دیکھا گیا ہے کہ رمضان المبارک میں بچے اور نوجوان طبقہ نماز فجر کے بعد کرکٹ گراؤنڈز کا رخ کرلیتے ہیں جس میں روزے کی حالت اور شدید گرمی کے دوران کرکٹ کھیلتے ہیں، اس سے پسینے کا اخراج بہت زیادہ ہوتا ہے جس کی وجہ سے ڈی ہائیڈریشن (پانی کی کمی) ہوتی ہے اور اس کے شکار افراد کو الٹی، متلی اور چکر آنے جیسی کیفیت کا سامنا رہتا ہے۔

(جاری ہے)

سیمی جمالی کے مطابق گرمی کے شکار مریضوں سے نمٹنے کیلئے تمام تر ہنگامی اقدامات کرلیے ہیں جن میں 50 بستروں پر مشتمل ایک خصوصی وارڈ کا قیام بھی ہے جس میں ٹھنڈک کا غیر معمولی چلرسسٹم نصب ہے۔ سیمی جمالی کے مطابق یہ 50 بستر شعبہ ایمرجنسی کے 150 بیڈز کے علاوہ ہیں جبکہ پورے اسپتال میں شدید گرمی کے دنوں میں منرل واٹر کا بھرپور انتظام ہے۔انہوںنے کہاکہ گرمی کے مضر اثرات کی وجہ سے انسانی جسم کا درجہ حرارت بڑھ جاتا ہے اور جسم میں پانی کم ہوجاتا ہے اس دوران اگر مریض کو فوری طبی امداد نہ ملے تو ہلاکت اور معذوری کا خدشہ بھی پیدا ہوجاتا ہے۔

سیمی جمالی کے مطابق اس بیماری کی اہم علامتوں میں جسم میں پانی کی کمی، تھکاوٹ، کمزوری، شدید سردرد، نکسیر کا پھوٹ جانا، متلی ہونا اور قے کا آنا، لمبی اور بڑی سانسیں لینا، غنودگی اور بہکی بہکی باتیں کرنا، جلد کا سرخ اور خشک ہوجانا، چکر آنا اور بے ہوشی یا جھٹکے سمیت علامات لو لگنے کے بعد مریض میں نمایاں ہوسکتی ہیں۔ڈاکٹر سیمی جمالی کے مطابق لو لگنے سے محفوظ رہنے کے لیے مشروبات کا زیادہ سے زیادہ استعمال، گرمی میں مشقت سے پرہیز، ہلکے رنگوں کے کپڑے زیب تن کریں جبکہ ہر ممکن حد تک تیز دھوپ میں چھتری کا استعمال بھی کریں۔