امرناتھ یاترا کیلئے بہتر اور مناسب سہولیات کی فراہمی حکومت کی آئینی ذمہ داری ہے‘ ریاستی اور مرکزی حکومت یاتریوں کیلئے مناسب طبی ور دیگر سہولیات کی فراہمی یقینی بنائیں ‘ گپھا تک جانے والی سڑکوں کی کشادگی جلد از جلد کی جائے ، بھارتی سپریم کورٹ نے 67صفحات پر مشتمل فیصلہ دیدیا

نئی دلی(اُردو پوائنٹ اخبار تازہ ترین۔ آئی این پی۔14دسمبر 2012ء) سپریم کورٹ نے امرناتھ یاترا کیلئے بہتر اور مناسب سہولیات کی فراہمی حکومت کی آئینی ذمہ داری قرار دیتے ہوئے حکومت جموں وکشمیر اور مرکز کو ہدایت دی ہے کہ وہ یاتریوں کیلئے مناسب طبی ور دیگر سہولیات کی فراہمی یقینی بنائیں جن میں گپھا تک جانے والی سڑکوں کی کشادگی بھی شامل ہے ۔جسٹس بی ایس چوہان اور جسٹس سوتنتر کمار پر مشتمل ڈویژنل بنچ نے مفاد عامہ کے تحت از خود نوٹس پر 67صفحات پر محیط اپنے فیصلے میں کہاہے کہ یہ حکومت کی آئینی ذمہ داری ہے کہ وہ یاتریوں کیلئے تمام طبی و دیگر سہولیات کی فراہمی یقینی بنائے ۔

فیصلے میں امرناتھ یاتریوں کیلئے طبی سہولیات کے فقدان پر مرکز و ریاستی حکومتوں کوتنقید کا نشانہ بنایا گیا ہے ۔

(جاری ہے)

سپریم کورٹ کے ڈویژنل بنچ نے اپنے فیصلے میں کہا ہے کہ یاتریوں کیلئے طبی سہولیات نہ ہونے کے برابر ہیں جبکہ سخت اور دشوار راستے بھی چلنے کے قابل نہیں ہیں جس سے جان کا خطرہ ہمیشہ برقرار رہتا ہے ۔اس فیصلے میں حکومت کو ہدایت دی گئی ہے کہ وہ پیدل یاتریوں اور پالکیوں یا گھوڑوں پر گپھا تک جانے والے یاتریوں کیلئے الگ الگ راستے بنائیں جوکہ 12فٹ سے کم کشادہ نہ ہوں ۔

واضح رہے کہ سپریم کورٹ نے یہ فیصلہ گذشتہ برس یاترا کے دوران کئی اموات پر لی گئی از خود نوٹس کے تحت جاری مفاد عامہ کی عرضی پر سماعت کے بعد صادر کیا ہے ۔اس معاملے میں قائم کی گئی اعلی اختیاری کمیٹی کی سفارشات کو قبول کرتے ہویت ڈویژن بنچ نے کہاکہ پالکیوں اور گھوڑوں کیلئے الگ اور پیدل یاترا کرنے والوں کیلئے علیحدہ سڑکیں تعمیر کی جائیں جن کی کشادگی12 فٹ سے کم نہ ہواور ان سڑکوں کیلئے حفاظت کے انتظامات بھی ہوں جیسے کہ لوہے کے سریے ،دیواریں وغیرہ جوکہ کمیٹی نے مناسب سمجھی ہوں اسکے علاوہ بالہ تل اور پنچترنی اور چندرواڑی روٹوں پر بنے بنائے ٹائلز لگائے جائیں ۔

سپریم کورٹ نے اترپردیشن ،ہریانہ ،پنجاب ،راجستھان ،ہماچل پردیش اور چندھی گڑھ کے چیف سیکریٹریز اور ہیلتھ سیکریٹریز کو ہدایت دی ہے کہ وہ یاترا کے دوران ڈاکٹروں اور دیگر طبی عملہ کو وہاں تعینات کریں تاکہ یاتریوں کو بہتر طبی سہولیات فراہم کی جاسکیں ۔فیصلے کے مطابق گپھا تک جانے والے روٹ کو کشادہ کیا جائے اور ان کے ارد گرد موٹی موٹی لوہے کی سلاخیں یا سیمنٹ و پتھر سے بنی دیواریں کھڑی کی جائیں ۔بنچ نے مزید کہاکہ آئین کی دفعہ21کے تحت یاتریوں کو دستیاب اختیارات اور سہولیات کو یکسر مسترد کیا جارہا ہے اور اس حوالے سے وضع کردہ قوانین کی پامالی کی جارہی ہے جس کی اجازت نہیں دی جائیے گی۔