محکمہ ہائوسنگ و پبلک ہیلتھ انجینئرنگ سمیت اس کے تمام ذیلی اداروں سے ڈیپو ٹیشن پر گئے تمام افسران و اہلکاران کو فوری واپس بلانے کی ہدایت ،

فیصل آباد (اُردو پوائنٹ اخبارتازہ ترین - اے پی پی۔ 24 جون2019ء) محکمہ ہائوسنگ و پبلک ہیلتھ انجینئرنگ سمیت اس کے تمام ذیلی اداروں سے ڈیپو ٹیشن پر گئے تمام افسران و اہلکاران کو فوری واپس بلانے کی ہدایت کر دی گئی ہے تاکہ محکمانہ کارکردگی کو بہتربنانے میں مدد مل سکے جبکہ مون سون کے دوران کسی بھی ہنگامی صورتحال سے نمٹنے کیلئے واسا کے افسران وا ہلکاران کو غیر ضروری تعطیلات سے بھی روک دیا گیا ہے اور واسا کے تمام حکام کو سختی سے ہدایت کی گئی ہے کہ وہ انتہائی ایمر جنسی کے علاوہ عام حالات میں ملازمین کو چھٹیاں دینے سے گریز کریں تاکہ بارشوں کے دوران نکاسی آب کے ضمن میں مین پاور کی کمی کا سامنا نہ کرنا پڑے۔

واسا کے ترجمان نے بتایاکہ اس ضمن میں سیکرٹری ہیلتھ کی جانب سے کہا گیاہے کہ مون سون کے دوران تیز رفتار اور بہترین سروس ڈیلیوری کیلئے واسا کی پلاننگ جدید تقاضوں سے ہم آہنگ اور جامع ماڈل ثابت ہونی چا ہیے اور اس سلسلہ میں برساتی نالوں و سیوریج سسٹم کی ایک ہفتہ کے اندر از سر نو اعلیٰ معیار کی سو فیصد ڈی سلٹنگ کو یقینی بنایا جائے۔

(جاری ہے)

انہوںنے بتایاکہ سیکرٹری ہاؤسنگ نے مزید ہدائت کی ہے کہ سیوریج و برساتی نالوں کی ڈی سلٹنگ کے بعد گندگی کو فوری ٹھکانے لگانے اور ڈی سلٹنگ کیلئے رات کے وقت کا انتخاب کیا جائے تاکہ اس عمل سے شہریوں کو زحمت نہ ہو۔

انہوں نے کہا کہ موسم برسات کے دوران ممکنہ شدید بارشوں کی ہنگامی صورتحال سے بطریق احسن نپٹنے کیلئے حکومت پنجاب کی طرف سے متعلقہ محکموں کو جامع اور سنجیدہ اقدامات کرنے کی ہدایت کی ہے تاکہ اس چیلنج میں کامیابی حاصل ہو لہٰذ ا واسا کو چاہئے کہ ارلی وارننگ سسٹم کو فعال رکھیں اور بارشوں سے قبل تمام ڈسپوزل اسٹیشنز ‘ سیوریج سسٹم اور برساتی نالوں کو خالی کر لیا جائے تاکہ بارشی پانی کے اخراج میں تاخیر نہ ہو۔

انہوں نے واٹر سپلائی اور سیوریج سے متعلق بہترین سروس ڈیلیوری پر زور دیتے ہوئے افسران سے کہا کہ وہ محکمانہ خدمات فراہم کرنے سے متعلق اپنے رویوں میں مثبت تبدیلی لائیں نیز اس ضمن میں عوام سے انکا رابطہ گہرا اور برتاؤ شائستہ ہونا چاہئے۔انہوں نے واسا میں زیر التواء امور کو جلد نمٹانے کی ہدایت کی اور کہا کہ سروسز کے حوالے سے عوام کو ایس ایم ایس کے ذریعے آگاہ رکھا جائے اور سیوریج یا واٹر سپلائی سے متعلق شکایات کا فوری ازالہ ہونا چاہئے۔ انہوںنے کہا کہ دستیاب وسائل میں بہترین سروسز کی فراہمی ہی دانشمندی ہے اس سلسلے میں بہترین انتظامی صلاحیتوں کا مظاہرہ کریں تاکہ عوام کا اعتماد بحال رہے اور وہ رضا کارانہ طور پر واسا کے واجبات ادا کریں۔