ایزی پیسہ کے ذریعے ڈیجیٹل ہیلتھ سروسز کی توسیع

 کراچی (اُردو پوائنٹ اخبارتازہ ترین۔ 28 جون2019ء) پاکستان میں مالیاتی انضمام کی جانب اپنی کوششوں کے ضمن میں ایزی پیسہ نے تھرڈ پارٹی سروس پروائیڈر کے تعاون سے ارزاں نرخوں پر صارف کی بہبود کو یقینی بنانے کی کوششیں جاری رکھی ہوئی ہیں۔
    یہ ہیلتھ سروس موبائل صارفین کودستیاب ہوگی اور صحت کی نگہداشت پر آنے والے اخراجات کو کم کرتے ہوئے صحت کی سہولیات تک رسائی میں اضافہ کیلئے معاون ہوگی۔

    اس سروس میں محفوظ اور قابل اعتماد آن لائن صحت کی خدمات فراہم کی جاتی ہیں جو کہ مریضوں کو دن کے 24 گھنٹے پاکستان میڈیکل اینڈ ڈینٹل کونسل (پی ایم ڈی سی) سے مجاز اور مستند شدہ نمائندوں سے منسلک رکھتی ہے ۔ پہلے مرحلے میں صارفین یو ایس ایس ڈی کوڈ یابرانچ چینل سے ہیلتھ سروس کا سالانہ پلان خرید سکتے ہیں اور جس کے بعد ہیلتھ سروسز ہاٹ لائن پر رابطہ کر کے ان خدمات سے استفادہ کیا جا سکتا ہے۔

(جاری ہے)

    اس سروس میں ایپلی کیشن کے ذریعے پاکستان کے عوام کو مزید سہولیات فراہم کی جائیں گی جس میں ادویات کی مفت ہوم ڈلیوری اور آن لائن کلیم داخل کرنے کے ساتھ ساتھ وائس کال اور فیس ٹو فیس ویڈیو کال جیسی اضافی خدمات بھی شامل ہیں۔ یہ سروس صرف صارفین تک محدود نہیں بلکہ خاندان کے دیگرچار افراد کو بھی آن لائن مشاورت بالکل مفت فراہم کی جائے گی۔

     اس ہیلتھ سروس میں مفت ویلیو ایڈڈ ہیلتھ انشورنس کے فوائد ہیلتھ سروس کے پیکیج کے ساتھ شامل ہیں اورمستقبل قریب میں صحت کی مزیدخدمات کے دیگر پرائس پلان کے اجراء کا بھی امکان ہے۔
    ٹیلی نار مائیکرو فنانس بینک کے قائم مقام سی ای او اسلم حیات نے اس موقع پر کہا کہ یہ نئی سروس ان لوگوں پر نمایاں اثرات مرتب کرنے کی صلاحیت رکھتی ہے جنہیں صحت کی بنیادی سہولیات تک رسائی کے فقدان کا سامنا ہے۔

انہوں نے کہا کہ ہمارا مقصد جدید موبائل سلوشنز کے ذریعے ہر ایک فرد کیلیے صحت کی سہولیات تک رسائی کو آسان بنانا ہے۔ یہ سروسز معیار میں بہتری اوراخراجات میں کمی کے ساتھ ساتھ عوام کو صحت کی بہتر خدما ت تک رسائی فراہم کرتی ہیں۔
     ٹیلی نار مائیکرو فنانس بینک کا موبائل بینکنگ پلیٹ فارم ایزی پیسہ سماجی ضروریات کو اہمیت دیتے ہوئے اپنی خدما ت کے دائرہ کار میں اضافے کے لیے پر عزم ہے ۔ یہ جدید سروس پاکستان میں ہیلتھ کیئر پر نمایاں اور مثبت اثر ات مرتب کرے گی۔