ڈی ایچ کیو ہسپتال میں 75 ڈاکٹر اور 30 سرجن ہیں، ادویات مفت دی جا رہی ہیں، ڈاکٹر فرمان

گلگت (اُردو پوائنٹ اخبارتازہ ترین - اے پی پی۔ 26 نومبر2019ء) ڈسٹرکٹ ہیڈ کوارٹر ہیلتھ ہسپتال گلگت میں 75ڈاکٹر اور 30 سرجن تعینات ہیں، ادویات مفت دی جا رہی ہیں۔اس بات کا اظہار ڈی ایچ کیو ہسپتال کے ایم ایس ڈاکٹر فرمان اور ڈی ایم ایس ڈاکٹر سرتاج نے میڈیا کو بریفنگ دیتے ہوئے کیا ہے۔انہوں نے کہا ہے کہ ہسپتال کے چھ ڈاکٹر باہر سے تنخواہ لے رہے ہیں جبکہ باہر کے 12 ڈاکٹر ڈیوٹی ڈی ایچ کیو میں دے رہے ہیں، یہ ایک مروجہ سسٹم ہے جو ضرورت کے مطابق تبدیل ہوتا رہتا ہے، کوئی راکٹ سائنس نہیں۔

بریفنگ کے موقع پر مشیر اطلاعات شمس میر اور جی بی این ایس کے صدر راجہ شاہ سلطان مقپون بھی موجود تھے، بریفنگ میں مزید بتایا گیا کہ ہسپتال میں ادویات مفت دی جارہی ہیں، سی ٹی سکین اور ایم آر آئی کی سہولیات موجود ہیں،او پی ڈی میں روزانہ 15سو سے 2ہزار مریضوں کا معائنہ ہوتا ہے، ایمرجنسی میں دو لیڈی ڈاکٹر اور ایک میل ڈاکٹر چوبیس گھنٹے موجود ہوتے ہیں،تمام اقسام کی ادویات موجود ہیں، ایم ایس کا کہنا تھا کہ ہسپتا ل میں آن کال سسٹم ہے ۔

(جاری ہے)

ایک مخیر شخص نے ہسپتال کو تین جدید ترین مشینیں عطیہ کی ہیں جبکہ پنجاب حکومت کی جانب سے بھی مشینری پہنچ گئی ہے، ان کی تنصیب کیلئے متعلقہ لوگوں کو بلالیا گیا ہے، جو سہولیات راولپنڈی اسلام آباد میں موجود ہیں وہ یہاں دستیاب ہیں، یہاں آکسیجن، ونٹی لیٹر سسٹم بھی موجود ہے ، آپریشن تھیٹر کے پانچ یونٹس ہیں، جس میں ایک آئی، ایک جنرل اور تین میجر سرجری یونٹ ہے۔

انہوں نے کہا کہ ڈی ایچ کیو میں سہولیات کی وجہ سے وزیر اعلیٰ ،چیف سیکرٹری اور تمام اعلیٰ سرکاری افسران چیک اپ کیلئے آتے ہیں۔ فری میں ڈائیلائسز کی سہولت موجود ہے،پہلے کے مقابلے میں دیگر شہروں میں ریفر ہونے کی شرح 60فیصد تک کم ہو گئی ہے، ٹراما سنٹر زیر تعمیر ہے، ہیلتھ کارڈ کے مریضوں کا بھی مفت علاج ہو رہا ہے۔یہاں موجود مریض سہولیات سے مطمئن ہیں، پورے ہسپتال میں کیمروں کے ذریعے مانیٹرنگ ہوتی ہے، جدید ترین سہولیات سے آراستہ ڈینٹل یونٹ موجود ہے۔

اس موقع پر مشیر اطلاعات شمس میر کا کہنا تھا کہ ڈی ایچ کیو گلگت بلتستان کا جدیدترین ہسپتال ہے، جہاں جدید مشینری، بہترین سہولیات، مفت علاج و معالجے کی سہولیات موجود ہیں، انہوں نے کہا کہ پیپلزپارٹی کی حکومت کے دور میں گلگت بلتستان کے ہسپتال قبرستان اور تمام ادارے بھوت بنگلے میں تبدیل ہو گئے تھے آج اداروں اورہسپتالوں پر عوام کا اعتماد بحال ہوا ہے،امجد ایڈووکیٹ سیاسی یتیمی کا رونا رو رہے ہیں، اور اداروں کے نام پر ناکام سیاست کررہے ہیں، گلگت بلتستان کی تمام سیاسی، مذہبی اور سماجی جماعتوں کے قائدین کو دعوت دیتے ہیں کہ وہ آئیں اور ہسپتالوں کی پرفارمنس اور خدمات کوخود دیکھیں، ہمیں یقین ہے کہ ہمارے بدترین سیاسی مخالفین بھی وزیر اعلیٰ کی گلگت بلتستان میں صحت کیلئے خدمات کا اعتراف کرینگے۔