جلدی امراض کی صورت میں کسی کوتاہی کا مظاہرہ نہ کیاجائے، بروقت علاج میں تاخیرسنگین نتائج کا باعث بن سکتی ہے، ماہر امراض جلد

فیصل آباد (اُردو پوائنٹ اخبارتازہ ترین - اے پی پی۔ 14 جنوری2020ء) معروف ماہرامراض جلد و لیزر سپیشلسٹ ڈاکٹر انیلہ اصغر نے کہاہے کہ جلد انسانی جسم کا ایک اہم جزو ہے جوانسانی صحت کو برقراراور مختلف بیماریوں سے محفوظ رکھنے میں انتہائی اہم کردار ادا کرتی ہے تاہم جلدی امراض سے پیدا ہونے والی بیماریاں پیچیدگی کی صورت میں موت کاسبب بھی بن سکتی ہیں اسلئے جلدی بیماریوںکے اثرات ظاہر ہوتے ہی فوری طور پر ماہرین امراض جلد سے رابطہ کرنا اور کسی قسم کی کوتاہی یا غفلت سے گریز کرنا چاہیے تاکہ بعد میں مریضوں کو کسی بڑی مشکل کا سامنا نہ کرناپڑے۔

اے پی پی سے بات چیت کے دوران انہوںنے کہا کہ جلدی بیماریوں کی کئی وجوہات ہیںجبکہ جسم میں ہارمونز کی تبدیلی ، جراثیم اور کئی ایسی بیماریاں ہیںجن کی اصل وجوہات کا علم نہیں مگر وہ بیماریاں لمبے عرصے کیلئے چلتی ہیںاورایسے مریضوں کو نفسیاتی مسائل کا سامنا ہوتا ہے جو بیماریاں انفیکشن کی وجہ سے ہوتی ہیں۔

(جاری ہے)

انہوںنے کہاکہ صاف ستھرا رہنے سے بہت سی جلدی بیماریوں سے بچا جا سکتا ہے۔

انہوں نے کہا کہ جلد کے ماہر ڈاکٹر پاکستان اور خاص کر فیصل آباد میں بہت کم ہیں اسلئے کئی غیر مستند ڈاکٹر بھی اس شعبے سے منسلک ہیں اور جلدی مریضوں کو نقصان اٹھانا پڑتا ہے جبکہ ایسے ڈاکٹرز میڈیا کا سہارا لے کر عوام کو گمراہ کر رہے ہیں۔انہوں نے کہا کہ فیصل آباد میں صرف ایک ہی شعبہ امراض جلد ہے جو کہ ڈسٹرکٹ ہیڈ کوارٹر ہسپتال میں واقع ہے ۔

انہوںنے کہا کہ جتنے جلدی امراض یا جتنی زیادہ جلدی بیماریاں بڑھ رہی ہیں اس کے لحاظ سے یہ سہولیات ناکا فی ہیں۔انہوں نے کہا کہ کچھ جلدی امراض جا ن لیوا ہیںاسلئے اگر بروقت تشخیص نہ ہو اور علاج نہ شروع کیا جائے تو مریض کی زندگی کو خطرہ ہو سکتاہے۔ انہوںنے کہاکہ کچھ دوائیوں کے اثرات کی وجہ سے جلد اتر جاتی ہے جو کہ خطرناک ہے اس طرح کی جلدی امراض موت کا سبب بن سکتی ہیں۔

انہوںنے کہا کہ تقریباً 20فیصد مریض جو کہ آئوٹ ڈور میں جاتے ہیں وہ جلدی امراض میں مبتلا ہوتے ہیں تاہم کچھ جلدی امراض مردوں میں زیادہ ہیںاور کچھ امراض عورتوں میں مگر چونکہ خواتین اپنی جلد کے بارے میں زیادہ فکر مند ہوتی ہیںاسلئے وہ زیادہ جلد کے ڈاکٹروں سے رابطہ کرتی ہیں۔ انہوںنے کہاکہ اکثر خواتین غیر مستند عطائیوں سے علاج معالجہ کروا کر اپنی سکن خراب کر لیتی ہیں لہٰذا انہیں صرف مستند ڈاکٹرز سے ہی رجوع کرنا چاہیے ۔