وبائی امراض میں احتیاطی تدابیر کا التزام شرعی حکم ہے، حافظ عبدالحمید عامر

جہلم (اُردو پوائنٹ اخبارتازہ ترین۔ 20 مارچ2020ء،نمائندہ خصوصی،طارق مجید کھوکھر) وبائی امراض کی روک تھام کے لیے احتیاطی تدابیر کا التزام شرعی حکم ہے۔ان خیالات کا اظہار جامعہ علوم اثریہ جہلم کے مہتمم حافظ عبدالحمید عامر نے اپنے بیان میں کیا۔ انہوں نے مزید کہا کہ ان حالات میں پوری قوم کو مجموعی طور پر اپنے خالق و مالک کے سامنے سربسجود ہونا چاہئے، پچھلے دنوں ایک عرب عالم سے سوال کیا گیا کہ مساجد اور مسلمانوں کی دیگر اجتماع کی جگہیں آخر کب تک بند رہیں گی؟ تو انہوں نے دل میں اُتر جانے والا جواب دیا:” جب تک ہمارا رب ہم سے ناراض رہے گا۔

“ نبی کریم صلی اللہ علیہ وسلم کا فرمان عالیشان بھی ہے:” جس قوم میں بے حیائی عام ہو گی تو اللہ تعالیٰ ان میں ایسی بیماریاں پھیلا دے گا،جو ان سے پہلے لوگوں نے سنی تک نہیں ہوں گی۔

(جاری ہے)

“(سنن ابن ماجہ) انہوں نے کہا کہ پچھلے دنوں وزیر اعظم نے اپنے خطاب میں کہا ہے کہ پوری متحد ہو کر کورونا سے جنگ جیتیں گے۔ افسوس کی بات ہے کہ یہ جملہ کفار کی گفتگو سے مستعار لیا گیا ہے ۔

مسلمانوں کا تو پختہ ایمان ہے کہ وبائی امراض اور دیگر آفات اللہ تعالیٰ کی طرف سے ایک آزمائش اور ہمارے گناہوں کی شامت ہوتی ہیں، جیسا کہ اللہ تعالیٰ نے سورت شوریٰ کی آیت نمبر 30میں فرمایا ہے:” تمہیں جو کچھ مصیبتیں پہنچتی ہیں، وہ تمہارے ہاتھوں کے اعمال کا نتیجہ ہے، حالانکہ وہ بہت سی باتوں سے درگزر فرما دیتا ہے۔“تھوڑا سا سوچیں، اپنے رب کی گرفت کا تصور ذہن میں لائیں، ایک مسلمان کیسے سوچ لے گاکہ وہ اللہ تعالیٰ کی آزمائشوں سے جنگ کر سکتا ہے؟۔

یہاں تو وقت ہے ، اللہ تعالیٰ کے سامنے گھٹنے ٹیک دینے کا․․․ گڑگڑا کر اپنے گناہوں کی معافی مانگنے کا․․․صبح و شام کے اذکار کا خوب التزام کرنے کا ․․․ اپنے رب پر توکل اور ایمان کو مضبوط کرنے کا․․․ہر طرح سے ہر کوئی مالک عرض و سماء کے قریب ہونے کی کوشش کرے۔ انہوں نے مزید کہا کہ ہم اسلامی رہنمائیوں کے ساتھ ساتھ حکومت اور ماہرین طب کی طرف سے دی گئی احتیاطی تدابیر کی بھرپور حمایت کرتے ہیں اور لوگوں سے اپیل کرتے ہیں کہ ان ہدایات پر سختی سے عمل کریں۔

ایک دوسرے کی اس حوالے سے رہنمائی کریں۔صفائی و ستھرائی کا خیال رکھیں۔ دعائیں اور التجائیں خوب کریں۔ خیر و بھلائی کے کاموں میں بڑھ چڑھ کر حصہ لیں۔ مسنون اذکار کی پابندی کریں۔ اس وبائی کے متعلق من جانب اللہ ہونے کا عقیدہ رکھیں اور پختہ یقین رکھیں کہ اگر ہم سب مل کر اپنا تعلق اللہ تعالیٰ سے مضبوط کرلیں گے تو ہمارا بخشنے اور رحم کرنے والا رب ضرور اس آزمائش کو ختم کر دے گا۔ان شاء اللہ