بیماریوں کے کنٹرول کے لئے بین لاقوامی تنظیموں اور مقامی ماہرین کی شرکت قابل ستائش ہے

اسلام آباد (اُردو پوائنٹ اخبارتازہ ترین - اے پی پی۔ 20 اگست2020ء) پارلیمانی سیکریٹری برائے صحت ڈاکٹر نوشین حامد نے کہا ہے کہا حکومت گلوبل پروگرام کے تحت بیماریوں کے کنٹرول کے لئے عالمی برادری کے شانہ بشانہ کھڑی ہے جبکہ اس سلسلہ میں بین لاقوامی تنظیموں اور مقامی ماہرین کی شرکت قابل ستائش ہے۔ ان خیالات کا اظہار انہوں نے جمعرات کو قومی ادارہ براے صحت اور فلیمنگ فنڈ گرانٹ برائے پاکستان کے زیر اہتمام "قومی سمپوزیم برائے اینٹی مائیکروبیل ریزسٹنس " سے خطاب کرتے ہوئے کیا۔

انہوں نے کہا کہ فلیمنگ فنڈ یو کے کی مدد سے حکومت پاکستان ملک میں اے ایم آر سٹریٹیجی کو لاگو کرنے میں پر عزم ہے۔ اس امداد کی بدولت پاکستان میں اینٹی مائیکروبیل ریزسٹنس کی نگرانی کے علاوہ انسانوں اور جانوروں میں استعدادکار کو بڑھانے میں مدد ملے گی۔

(جاری ہے)

اینٹی مائیکروبیل ریزسٹنس کی نگرانی نیشنل ایکشن پلان میں سات نکاتی ایجنڈے میں شامل ہے جس کے تحت انسانوں اور جانوروں کی لیبارٹریوں کی بہتری کے ساتھ ساتھ اہلکاروں کی استعداد میں اضافے پر بھی توجہ دی جاے گی۔

انہوں نے کہا کہ اس کے ساتھ ساتھ اے ایم یو اور اے ایم سی کے شعبے میں مختلف سروے کرنے میں بھی مددگار ثابت ہو گا۔ سمپوزیم کے انعقاد سے پاکستان میں انسانوں اور جانوروں اور ماحول پر اے ایم آر کی وجہ سے مرتب ہونے والے اثرات اور خطرات کا جائزہ لینے میں بہت مدد حاصل ہوئی۔ انہوں نے کہا کہ اے ایم ار دنیا کو لاحق بڑے خطرات میں سے ایک ہے۔ یہ مائکرو آرگنزمز کے ایسے انداز میں تیار ہونے کی طرف اشارہ کرتا ہے جو خاص قسم کے جراثیم کو مارنے میں مددگار ثابت ہوتا ہے۔

جو ہمارے جسم میں بہت عرصے تک بے اثر رہتے ہیں۔ سمپوزیم سے خطاب کرتے ہوئے ایگزیکٹو ڈائریکٹر قومی ادارہ صحت میجر جنرل عامر اکرام نے کہا کہ اینٹی بایوٹکس کوایک خاص انداز میں استعمال کرنے کی ضرورت ہے خاص طور پر ریزیسٹنس سوپر بگز کے نمودار ہونے سے بچاؤ کے لیے۔ اس سمپوزیم کے انعقاد سے سٹیک ہولڈرز کو ایک ایسا پلیٹ فارم میسر آیا ہے جس سے اینٹی مائیکروبیل کے انسانوں, جانوروں اور صحت کے ماحول میں ہونے والی تبدیلیوں کی طرف نشاندہی کرنے کا موقع ملا ہے ۔

انہوں نے کہا کہ ورلڈ ہیلتھ اسمبلی ریزولیوشن 2015 (WHA68.7) سے جڑے عزم کو لے کر پاکستان نے 2017ء میں نیشنل اے ایم ار فریم ورک، نیشنل ایکشن پلان اور وسیع پیمانے پر نیشنل اے ایم آر سٹیئرنگ کنٹرول کمیٹی کی تشکیل کی۔ اے ایم آر کی سنگینی کے پیش نظر حکومت پاکستان نے قومی ادارہ صحت میں آئی پی سی اوراے ایم آر کے نیشنل پروگرام کے اغاز کے لیے مالی معاونت کا اعلان کیا ہے۔

سمپوزیم میں نیشنل ہیلتھ سروسز، ریگولیشنز اینڈ کوارڈینیشن، نیشنل فوڈ سکیورٹی اینڈ ریسرچ اور ماحولیاتی تبدیلی کی وزارتوں کے نمائندوں کے ساتھ ساتھ صحت سے متعلقہ ماہرین, لائیو سٹاک کے اداروں کے نمائندوں, ماہرین تعلیم, بین لاقوامی تنظیموں, پرائیویٹ تنظیموں, ہسپتالوں کے نمائندوں , سیاسی تنظیموں اور بیوروکریٹس کی بڑی تعداد نے شرکت کی۔