دہلی، 14برس تک عمر گروپ کے لڑکوں میں کینسر کے لحاظ سے ایشیا میں سرفہرست

نئی دہلی(اُردو پوائنٹ اخبارتازہ ترین - این این آئی۔ 22 اگست2020ء) کینسر کے مرض کا شکار صفر سے 14 برس کے عمر گروپ کے لڑکوں کی تعداد بھارت کے قومی دارالحکومت دہلی میں دیگر ایشیائی ملکوں کے مقابلے میں سب سے زیادہ ہے۔ میڈیارپورٹس کے مطابق کینسر کے مرض کا شکار صفر سے 14 برس کے عمر گروپ کے لڑکوں کی تعداد بھارت کے قومی دارالحکومت دہلی میں دیگر ایشیائی ملکوں کے مقابلے میں سب سے زیادہ ہے۔

بھارت میں کینسر کے مریضوں کے اعداد و شمار یکجا کرنے والے حکومتی پروگرام نیشنل کینسر رجسٹری کی طرف سے شائع تازہ ترین رپورٹ کے مطابق قومی دارالحکومت دہلی میں رہنے والے چودہ برس تک کے عمر کے ہر دس لاکھ لڑکوں میں 203.1 کینسر کا شکار ہیں۔نیشنل کینسر رجسٹری کا پروگرام بھارت میں طبی خدمات پر نگاہ رکھنے والے ادارے انڈین کاونسل آف میڈیکل ریسرچ کے تحت چلایا جاتا ہے۔

(جاری ہے)

رپورٹ میں کہا گیا ہے کہ صفر سے 19 برس کے عمر گروپ میں کینسر سے سب سے زیادہ متاثرین کی تعداد چین کے جیانگ مین شہر میں ہے، جہاں ایشیا میں لڑکوں میں کینسر کے سب سے زیادہ واقعات درج کیے گئے ہیں۔ تاہم دہلی اس سے صرف ذرا ہی پیچھے ہے۔ دہلی میں، جیانگ مین کے مقابلے فی دس لاکھ میں صرف چھ کیسز کم ہیں۔ یہ رپورٹ 2012-2016 کے درمیان پورے ملک میں کینسر کا شکار مریضوں کی تعداد کی بنیاد پر تیا رکی گئی ہے۔

اس میں بھارت کے آبادی کی بنیاد ( بی سی آر) پر 28 کینسر رجسڑیز اور ہسپتالوں کی بنیاد(ایچ بی سی آر)پر 58 کینسر رجسٹریز کا احاطہ کیا گیا ہے۔ پی بی سی آر سے مراد ایک جغرافیائی یونٹ ہے۔ اس میں ایک ضلع یا پھر کوئی ریاست بھی ہوسکتی ہے۔رپورٹ کے مطابق دہلی میں کینسر کے تمام مریضوں میں 14برس تک کے لڑکوں کی تعداد 4.7 فیصد ہے جبکہ 19 برس تک کے لڑکوں کی تعداد 6.3 فیصد ہے۔

اس طرح دہلی تمام 28 پی بی سی آر میں بچوں میں کینسر کے مریضوں کے لحاظ سے سر فہرست ہے۔ اس کے بعد اورنگ آباد (مہاراشٹر)، حیدرآباد (تلنگانہ) اور واردھا (مہاراشٹر) اضلاع نیز پوری منی پور ریاست کا نمبر آتا ہے۔ لڑکیوں کے معاملے میں بھی یہ صورت حال زیادہ مختلف نہیں ہے۔ دہلی اس معاملے میں ملک میں سرفہرست ہے۔ اس کے بعد تھرواننت پورم، چینئی، کولم اور آئزول کا نمبر ہے۔