برطانیہ پاکستان میں ماں بچے کی صحت کے لئے 10ارب روپے دے گا سمجھوتے پر دستخط

اسلام آباد (اردوپوائنٹ اخبار تازہ ترین05اکتوبر2006) برطانیہ نے پاکستان میں ماں اور بچے کی صحت کیلئے 10ارب روپے کی گرانٹ دینے کا اعلان کیا ہے تاکہ زچگی کے باعث ماں اور نوزائیدہ بچوں کی اموات کو روکا جاسکے اس سلسلہ میں جمعرات کو وزارت صحت میں برطانیہ کے بین الاقوامی ترقی کے وزیر گریتھ تھامس اور وفاقی وزیر صحت محمد نصیر خان نے معاہدے کی دستاویز پر دستخط کئے اس موقع پر وفاقی وزیر صحت سید انور محمود اور برطانوی وفد کے دیگر حکام بھی موجود تھے بعد ازاں صحافیوں سے بات چیت کرتے ہوئے برطانوی وزیر تھامس نے کہا کہ پاکستان میں ہر سال 30ہزار خواتین زچگی کے دوران بعض پیچیدگیوں کے باعث موت کے منہ میں چلی جاتی ہیں جبکہ ایک لاکھ 60 ہزار نوزائیدہ بچے پیدائش کے ایک ماہ کے دوران جاں بحق ہوجاتے ہیں انہوں نے کہا کہ برطانوی امداد کا تعاون حکومت پاکستان قومی پروگرام برائے ماں اور بچے کی صحت کیلئے ہے اس پروگرام کے 1/3 حصہ کی برطانوی حکومت مالی معاونت کرے گی اس امداد سے توقع ہے کہ 2006ء اور 2011ء کے دوران تقریباً 30 ہزار عورتوں اور 1لاکھ بچو ں کی زندگیوں کو بچایا جاسکے گا برطانوی وزیر نے کہا کہ ملک بھر میں 10 ہزار سے زائد خاندانوں کی صحت اور معیار زندگی بہتر ہوگا ۔

(جاری ہے)

اس موقع پر وفاقی وزیر صحت محمد نصیر خان نے پریس کانفرنس سے خطاب کرتے ہوئے بتایا کہ ماں اور بچے کی صحت کے قومی پروگرام پر تقریباً 27ارب روپے آئندہ سال تک خرچ کئے جائیں گے اس پروگرام کے تحت 10 ہزار دائیوں کی تربیت 275ہسپتالوں میں صحت کی سہولیات  بالخصوص ماں اور بچے کی صحت سے متعلق زیادہ سے زیادہ سہولیات کی فراہمی کو یقینی بنایا جائے گا 15 ہزار سٹاف کی تربیت  تحصیل ضلع کے ہسپتالوں میں ماں اور بچے کی صحت کی سہولیات کی فراہمی کو یقین بنانے کے اقدامات اٹھائے جا ئیں گے وفاقی وزیر صحت محمد نصیر خان نے کہاکہ وزارت صحت میں فروری 2005ء کے دوران ما ں اور بچے کی صحت سے متعلق خصوصی سیل قائم کیا گیا ہے انہوں نے کہا کہ برطانوی حکومت کی طرف سے گرانٹ ملنے سے ملک میں زچگی کے دوران خواتین اور نوزائیدہ بچوں کی زندگیوں کو بچایا جاسکے گا پاکستان برطانوی حکومت کا شکر گزار ہے موجودہ حکومت ملک کے عوام کو زندگی کی بنیادی سہولیات صحت سمیت فراہم کرنا اپنی اولین ترجیح سمجھتی ہے اور اس پر عمل پیرا بھی ہے ۔