کویت کا ایک ہزار سے زائد غیرملکیوں کو ڈی پورٹ کرنے کا فیصلہ

ان افراد کو نئے سال کے پہلے پانچ دنوں میں سکیورٹی کریک ڈاؤن کے دوران گرفتار کیا گیا

ساجد علی پیر 8 جنوری 2024 17:47

کویت کا ایک ہزار سے زائد غیرملکیوں کو ڈی پورٹ کرنے کا فیصلہ

کویت سٹی ( اُردو پوائنٹ اخبارتازہ ترین ۔ 08 جنوری 2024ء ) خلیجی ملک کویت نے ایک ہزار سے زائد غیرملکیوں کو ڈی پورٹ کرنے کا فیصلہ کرلیا۔ گلف نیوز کے مطابق کویت میں مختلف قوانین کی خلاف ورزی پر نئے سال کے پہلے پانچ دنوں میں ایک ہزار سے زائد تارکین وطن کو سکیورٹی کریک ڈاؤن میں گرفتار کیا گیا، حراست میں لیے گئے افراد کی اکثریت کو اب قانون کے تحت ملک بدر کرنے کی کارروائی کی جا رہی ہے۔

بتایا گیا ہے کہ نائب وزیر اعظم اور وزیر داخلہ شیخ طلال الخالد کی طرف سے ہدایت کی گئی حفاظتی مہمات ملک سے غیرقانونی کارکنوں کو ملک بدر کرنے کی وسیع تر کوششوں کا حصہ ہیں، شیخ طلال الخالد نے قانونی ملازمت کے طریقوں کو برقرار رکھنے کے حکومتی عزم کو اجاگر کرتے ہوئے ان مہمات کی ضرورت پر زور دیا۔

(جاری ہے)

معلوم ہوا ہے کہ پچھلے سال کے شروع میں کویت کی وزارت داخلہ نے مقامی قوانین کی خلاف ورزی کرنے پر سب سے زیادہ تارکین وطن کی ملک بدری رپورٹ کی تھی، یکم جنوری سے 31 دسمبر 2023ء تک کے عرصے میں 42 ہزار 892 تارکین وطن کو ملک بدر کیا گیا جن میں 17 ہزار 701 خواتین بھی شامل تھیں۔

بتایا جارہا ہے کہ گزشتہ برس ڈی پورٹ کیے جانے والوں میں سے 42 ہزار 265 کو انتظامی خلاف ورزیوں کے تحت ملک بدری کے زمرے میں رکھا گیا جن میں 24 ہزار 609 مرد اور 17 ہزار 656 خواتین شامل تھیں، مزید برآں 627 افراد عدالتی احکامات کی روشنی میں ملک بدر ہوئے، جن میں 582 مرد اور 45 خواتین شامل تھیں، ملک بدریوں کی تعداد میں نمایاں اضافے کی وجہ سکیورٹی سروسز کے فعال حفاظتی اقدامات اور مہمات کو قرار دیا گیا۔