جامعہ زرعیہ فیصل آباد تربیت یافتہ افرادی قوت، تحقیق اور آؤٹ ریچ پروگراموں کی صورت میں قوم کی خدمت کے لئے پرعزم ہے،وائس چانسلر

فیصل آباد (اُردو پوائنٹ اخبارتازہ ترین - اے پی پی۔ 29 اپریل2024ء) جامعہ زرعیہ فیصل آباد کے وائس چانسلر ڈاکٹر اقرار احمد خان نے کہا کہ سکاؤٹس انسانیت کی خدمت اور معاشرے میں بھائی چارے کے پیغام کو عام کرنے کے ساتھ ساتھ معاشرتی و سماجی مسائل کے حل کے حوالے سے شعور اجاگر کرنے میں اہم کردار ادا کرتے ہیں۔ انہوں نے ایگری سکاؤٹس گروپ زرعی یونیورسٹی فیصل آباد کے 51ویں سالانہ تقریب اور ایلومنائی میٹ میں بطور مہمان خصوصی اپنے خطاب کے دوران کہا کہ یونیورسٹی تربیت یافتہ افرادی قوت، تحقیق اور آؤٹ ریچ پروگراموں کی صورت میں قوم کی خدمت کے لئے پرعزم ہے۔

انہوں نے کہا کہ زرعی یونیورسٹی فیصل آباد کے سکاؤٹس ہمیشہ قدرتی آفات کے وقت قوم کے ساتھ کھڑے رہے اور چیلنجز سے نمٹنے میں اپنا بھرپور کردار ادا کیا۔

(جاری ہے)

انہوں نے کہا کہ زرعی یونیورسٹی کے سکاؤٹس نوجوان نسل کی اخلاقی تربیت اور ان کی خداداد صلاحیتوں کو نکھارنے کے لئے بھی وقتاً فوقتاً سیمینار و دیگر پروگرام ترتیب دیتے رہتے ہیں۔ پرنسپل افسر تعلقات عامہ ڈاکٹر محمد جلال عارف نے سکاؤٹس کی معاشرے کے لئے بہتری کی سرگرمیوں کو سراہتے ہوئے امید ظاہر کی کہ سکائوٹس آنے والے سالوں میں بھی اسی انسانی خدمت کے جذبے کے تحت اپنی خدمات سرانجام دیتے رہیں گے۔

صدر سکاؤٹس گروپ ڈاکٹر عرفان افضل نے کہا کہ زرعی یونیورسٹی فیصل آباد کے سکاؤٹس صوبے میں 51 سالوں سے کام کرنے والے بہترین سکاؤٹس ہیں۔ انہوں نے معاشرے کی بہتری کے لئے ہر ممکن کوششوں کے عزم کا اظہار کیا۔ تقریب میں نمائش، کیمپ فائر، سالانہ رپورٹ و دیگر پروگرام ترتیب دیئے گئے جبکہ اس موقع پر ڈائریکٹر گریجوایٹ سٹڈیز ڈاکٹر خالد بشیر، ڈائریکٹر سٹوڈنٹس افیئر ڈاکٹر ندیم عباس،سینئر ٹیوٹر ڈاکٹر شوکت علی و دیگر بھی موجود تھے۔