متحدہ قومی موومنٹ کی جانب سے تحریکِ انصاف سے کیئے گئے مطالبے سامنے آگئے

ایم کیو ایم پاکستان نے مطالبہ کیاہے کہ اسے وفاق میں دو وزارتیں دی جائیں، نجی ٹی وی چینل کا دعویٰ

منگل 14 اگست 2018 15:00

کراچی(اُردو پوائنٹ اخبارتازہ ترین - این این آئی۔ 14 اگست2018ء) متحدہ قومی موومنٹ کی جانب سے تحریکِ انصاف سے کیئے گئے مطالبے سامنے آگئے ہیں، ایم کیو ایم پاکستان نے مطالبہ کیاہے کہ اسے وفاق میں دو وزارتیں دی جائیں۔نجی ٹی وی چینل کے مطابق ایم کیو ایم پاکستان پی ٹی آئی حکومت کی وفاقی کابینہ کا حصہ بننا چاہتی ہے، ایم کیو ایم نے پی ٹی آئی سے مطالبہ کیا ہے کہ اسے وفاقی کابینہ میں 2 وزارتیں دی جائیں۔

(جاری ہے)

یہ مطالبہ ایسے وقت میں سامنے آیا ہے جب گزشتہ روز اسلام آباد کے ایک نجی ہوٹل میں عمران خان کی جانب سے نو منتخب ارکانِ قومی اسمبلی کو عشائیے کی دعوت دی گئی اور اس میں ایم کیو ایم کے وفد نے بھی شرکت کی۔ذرائع کے مطابق ایم کیو ایم نے شعبہ تعلیم، صحت یا انفارمیشن ٹیکنالوجی(آئی ٹی)کی وزارتوں میں سے کوئی دو وزارتیں مانگی ہیں۔ذرائع کے مطابق ایم کیو ایم پاکستان کے مطالبے پر پی ٹی آئی کی اعلی قیادت غور کر رہی ہے، تاہم ایم کیو ایم کو کابینہ میں کتنا حصہ ملے گا، اس کا حتمی فیصلہ عمران خان کریں گے۔

عمران خان کی جانب سے دیے گئے عشائیے میں ایم کیو ایم پاکستان کی طرف سے شرکت کرنے والے وفد میں ڈاکٹرخالد مقبول صدیقی، اقبال محمد علی، کشور زہرہ، امین الحق اور اسامہ قادری شامل تھے۔